चेंबूरच्या (chembur) पिंजरापोल परिसरात गंभीर दुखापतींसह सुमारे 20 मांजरी (cats) मृत (death) अवस्थेत आढळल्या आहेत, ज्यामुळे या भागात प्राण्यांवरील क्रूरतेबाबत गंभीर चिंता निर्माण झाली आहे.

आरसीएफ (RCF) पोलिसांनी अज्ञात व्यक्तींविरुद्ध गुन्हा (FIR) दाखल केला आहे. या कृत्यासाठी जबाबदार असलेल्यांचा शोध घेण्यासाठी तपास सुरू केला आहे.

स्थानिक प्राणी-पालक रुबिना पठाण यांनी या परिसरातील काही धक्कादायक घटनांची माहिती दिल्यानंतर हे प्रकरण उजेडात आले.

तक्रारीनुसार, ऑगस्ट महिन्यात पठाण यांना मांजरींचे विद्रूप झालेले मृतदेह आढळले होते. त्यानंतर 4 सप्टेंबर रोजी त्यांना आणखी सहा मृत मांजरी आढळल्या आहेत.

त्यापैकी काहींना गंभीर दुखापती होत्या आणि त्यांचे अंतर्गत अवयव बाहेर आलेले दिसत होते.

दुसऱ्या दिवशी, म्हणजेच 5 सप्टेंबर रोजी, पठाण यांना आणखी एक मृत मांजर आणि अत्यंत दयनीय अवस्थेत असलेले एक मांजरीचे पिल्लू आढळले.

वारंवार घडणाऱ्या या घटनांनंतर, त्यांनी 9 सप्टेंबर रोजी पोलिसांशी संपर्क साधला आणि त्यानंतर आरसीएफ पोलीस ठाण्यात गुन्हा दाखल करण्यात आला.

पोलिसांनी (mumbai police) अज्ञात आरोपींविरुद्ध 'भारतीय न्याय संहिता (BNS), 2023' च्या कलम 325 अन्वये, तसेच 'प्राण्यांवरील क्रूरता प्रतिबंधक कायदा, 1960' च्या कलम 11(1)(अ) आणि 11(1)(ल) अन्वये गुन्हा दाखल केला आहे.

कलम 325 मध्ये प्राण्यांना मारणे, विष देणे, अपंग करणे किंवा निकामी करणे यांसारख्या गुन्ह्यांचा समावेश होतो; या गुन्ह्यांसाठी पाच वर्षांपर्यंतचा कारावास, दंड किंवा दोन्ही शिक्षा होऊ शकतात.

संभाव्य संशयितांची ओळख पटवण्यासाठी आणि प्राण्यांसोबत नेमके काय घडले हे शोधण्यासाठी पोलीस अधिकारी परिसरातील सीसीटीव्ही फुटेजची तपासणी करत आहेत.

पोलिसांकडे जाण्यासाठी पठाण यांना मदत करणाऱ्या 'पेटा इंडिया' (PETA India) या संस्थेने, या हत्यांसाठी जबाबदार असलेल्यांना अटक करण्यास आणि त्यांना शिक्षा मिळवून देण्यास मदत करणाऱ्या माहितीसाठी 50,000 रुपयांपर्यंतचे बक्षीस जाहीर केले आहे.

तसेच, नागरिकांनी प्राण्यांवरील क्रूरतेच्या संशयास्पद घटनांची माहिती संबंधित कायदेशीर यंत्रणांना द्यावी, असे आवाहनही संस्थेने केले आहे.

'पेटा इंडिया'च्या 'क्रुएल्टी रिस्पॉन्स ऑफिसर' ईशानी राठी यांनी सांगितले की, प्राण्यांवरील अत्याचाराची माहिती पोलिसांना देणे महत्त्वाचे आहे.

तसेच त्यांनी नमूद केले की, संशोधनातून प्राण्यांवरील क्रूरता आणि इतर गुन्हेगारी कृत्ये यांच्यात संबंध असल्याचे दिसून आले आहे.

या प्रकरणात गुन्हा दाखल करण्याचे निर्देश दिल्याबद्दल आणि कारवाई केल्याबद्दल संस्थेने आरसीएफचे वरिष्ठ पोलीस निरीक्षक दत्तात्रय पाटील यांचे कौतुकही केले.

ज्यांच्याकडे या घटनेबाबत काही माहिती असेल, ते 'पेटा इंडिया'शी info@petaindia.org या ईमेलद्वारे गोपनीयरीत्या संपर्क साधू शकतात.

हेही वाचा

वांद्रेतील भाभा रुग्णालयात दोन महिन्यांत कार्डिओलॉजी वॉर्ड उभारण्यात येणार

वर्सोव्यातील अग्निशमन केंद्राचे आरक्षण हटवण्यास काँग्रेसचा विरोध