'मोनोराणी' आठवडाभर यार्डातच!

पुढील आठवडाभर मोनोची सेवा बंदच राहण्याची शक्यता आहे. कारण मोनो गाड्यांच्या सुरक्षा चाचण्यांच्या अहवालानंतरच मोनो सेवा सुरू करण्याचे आदेश मुंबई महानगर प्रदेश विकास प्राधिरणा (एमएमआरडीए)चे महानगर आयुक्त युपीएस मदान यांनी दिले आहेत.

  • 'मोनोराणी' आठवडाभर यार्डातच!
SHARE

गुरूवारी पहाटे ५.१५ वाजल्यापासून ठप्प झालेली मोनोरेलची सेवा तिसऱ्या दिवशीही ठप्पच आहे. एवढंच नाही, तर पुढील आठवडाभर मोनोची सेवा बंदच राहण्याची शक्यता आहे. कारण मोनो गाड्यांच्या सुरक्षा चाचण्यांच्या अहवालानंतरच मोनो सेवा सुरू करण्याचे आदेश मुंबई महानगर प्रदेश विकास प्राधिरणा (एमएमआरडीए)चे महानगर आयुक्त युपीएस मदान यांनी दिले आहेत. या चाचण्या पूर्ण करूत अहवाल सादर करण्यासाठी किमान आठवडाभर लागणार असल्याची माहिती अतिरिक्त महानगर आयुक्त संजय खंदारे यांनी 'मुंबई लाइव्ह'ला दिली आहे.

मोनो आठवडाभर यार्डात राहिल्यास त्याचा फटका प्रवाशांना तर बसणार आहेच; पण 'एमएमआरडीए'लाही मोठं आर्थिक नुकसान सहन करावं लागणार आहे.


प्रवाशांच्या सुरक्षेसाठीच

चेंबूर मोनो स्थानकातून वडाळ्याच्या दिशेने निघालेल्या मोनो गाडीला गुरूवारी पहाटे म्हैसूर स्थानकादरम्यान इलेक्ट्रीक ब्रेक फेल झाल्याने आग झाली. ही आग इतकी मोठी होती की त्यात मोनो गाडीचे दोन डबे जळून खाक झाले. आग लागल्याने मोनोची सेवा ठप्प झालीच; पण प्रवाशांच्या सुरक्षेचा प्रश्नही एेरणीवर आला. या प्रकरणाची गंभीर दखल घेत मदान यांनी त्वरीत चौकशीचे आदेश आहेत. त्यानुसार प्रवाशांच्या सुरक्षेच्यादृष्टीने मोनो पूर्णपणे सुरक्षित असल्याचं सिद्ध झाल्याशिवाय मोनो ट्रॅकवर आणायची नाही असाही निर्णय घेण्यात आला आहे.



फायर फायटींग सिस्टीम नाही?

या निर्णयानुसार मोनो गाड्यांची चाचणी सुरू आहे. तर दुसरीकडे आग नेमकी कशी लागली यासह गाडीत फायर फायटींग सिस्टीम आहे का? असल्यास ती सक्षम आहे का? नसेल तर ती का नाही? यासंबंधीचीही चौकशी करण्यात येणार असल्याचं समजत आहे. दुसऱ्या बाजूला मोनोमध्ये 'फायर फायटींग सिस्टीम' नसल्याची जोरदार चर्चा आहे.


अपयशी मार्ग

याविषयी खंदारे यांना विचारले असता त्यांनी काहीही बोलण्यास नकार दिला.
चेंबूर ते वडाळा मोनो मार्ग पाहिल्यास उत्पन्नाच्या दृष्टीकोनातून हा मार्ग पूर्णपणे अपयशी ठरला आहे. कारण या मार्गाला प्रवाशीच मिळत नाहीत. जोपर्यंत चेंबूर ते जेकब सर्कल असा पूर्ण मार्ग तयार होत नाही, तोपर्यंत मोनो तोट्यातच राहणार आहे.


१० लाखांपर्यत तोटा?

सद्यस्थितीत मोनोला प्रवासी मिळत नसल्याने 'एमएमआरडीए'ला दिवसाला अंदाजे ७ लाखांपर्यंतचा तोटा सहन करावा लागत आहे. हा आकडा १० लाखांपर्यंत असल्याचंही म्हटले जात आहे.

जर मोनो सेवेत असताना ७ ते १० लाखांचा तोटा सहन करावा लागत असेल, तर आता मोनो किमान १० दिवस बंद राहणार आहे. त्यामुळे 'एमएमआरडीए'ला होणाऱ्या तोट्यात आणखी भर पडणार आहे. महत्त्वाचं म्हणजे प्रवाशांना हा मार्गच फायद्याचा नसल्याने प्रवासी मोनोकडे वळत नसताना आता मोनोच्या सुरक्षेचाच प्रश्न एेरणीवर आला आहे. शिवाय जुने प्रवासी पुन्हा मोनोकडे वळतील का? असाही प्रश्न निर्माण झाला आहे.



हेही वाचा-

इलेक्ट्रीक बसचे ७ 'बेस्ट' फायदे

अखेर मेट्रोसाठीचं पहिलं टीबीएम मशिन मुंबईच्या पोटात शिरलं!


संबंधित विषय
ताज्या बातम्या