म्हाडात घर खरेदी करून देण्याचे सांगत लाखो रुपयांची फसवणूक करणाऱ्या एका महिला आणि पुरुषाला अटक करण्यात आली आहे. अनुराधा जाधव आणि शाम सातार्डेकर अशी आरोपींची नावे आहेत. म्हाडा अधिकाऱ्यांशी चांगले संबंध असून घर खरेदी करून देण्याचे सांगत बनावट कागदपत्रे देत या दोघांनी सुरज कुमार दुबे यांना सात लाखांचा चुना लावला. याप्रकरणी दुबे यांनी वांद्र्याच्या खेरवाडीत पोलीस स्थानकात तक्रार दाखल केली. त्यानंतर दोघांनाही अटक करत 12 दिवस पोलीस कोठडी सुनावण्यात आली आहे. वरीष्ठ पोलीस अधिकारी सुजाता पाटिल यांनी ही कारवाई केली.