मुंबई लोकलमधून प्रवास करणाऱ्या महिला प्रवाशांच्या सुरक्षेला अधिक बळकटी देण्यासाठी मध्य रेल्वेच्या रेल्वे सुरक्षा दलाने (RPF) आणि Yatri App यांच्या संयुक्त विद्यमाने हे फिचर सुरू करण्यात आले आहे.
मुंबईची उपनगरीय रेल्वे सेवा जगातील सर्वात व्यस्त रेल्वे नेटवर्कपैकी एक असून दररोज लाखो महिला प्रवासी या सेवेद्वारे प्रवास करतात. अशा परिस्थितीत महिलांना प्रवासादरम्यान कोणताही धोका किंवा असुरक्षितता जाणवल्यास SOS फीचरच्या मदतीने थेट RPF शी संपर्क साधता येणार आहे.
महिला प्रवाशांना लोकल ट्रेन, प्लॅटफॉर्म, पादचारी पूल (FOB) किंवा स्थानक परिसरात असुरक्षित वाटल्यास त्या Yatri App मधील SOS बटण दाबू शकतात.
SOS सक्रिय होताच:
प्रवाशाचे लाईव्ह लोकेशन
ट्रेन क्रमांक
मार्गाची माहिती
रेक (डबा संच) तपशील
जवळचे रेल्वे स्थानक
ही सर्व माहिती स्वयंचलितपणे RPF कंट्रोल रूमकडे पाठवली जाईल. त्यामुळे आपत्कालीन परिस्थितीत मदत अधिक वेगाने पोहोचू शकणार आहे.
SOS बटण फक्त Yatri App मध्ये महिला म्हणून नोंदणी केलेल्या वापरकर्त्यांनाच दिसेल.
ही सेवा दररोज रात्री 10 ते सकाळी 6 वाजेपर्यंत सक्रिय असेल.
चुकीने SOS बटण दाबले गेल्यास अलर्ट रद्द करण्यासाठी 5 सेकंदांचा पर्याय देण्यात आला आहे.
हेल्पलाइनवर फोन करून लोकेशन सांगण्याची गरज भासणार नाही.
या नव्या सुविधेमुळे RPF ला प्रवाशांच्या अचूक स्थानाची आणि ट्रेनसंबंधित माहितीची त्वरित माहिती मिळणार असल्याने आपत्कालीन प्रतिसादाचा वेळ कमी होईल. तसेच रेल्वे सुरक्षा व्यवस्थेत तंत्रज्ञानाचा अधिक प्रभावी वापर करून महिला प्रवाशांना सुरक्षित प्रवासाचा विश्वास देण्याचा प्रयत्न केला जात आहे.
मध्य रेल्वेने ही सुविधा महिला सुरक्षेच्या दृष्टीने महत्त्वाचे पाऊल असल्याचे सांगत सर्व प्रवाशांना सुरक्षित, संरक्षित आणि आरामदायी प्रवास उपलब्ध करून देण्याची आपली बांधिलकी पुन्हा अधोरेखित केली आहे.
हेही वाचा