दादर स्थानकावरील प्लॅटफॉर्म क्रमांक 4 चर्चगेटच्या दिशेने 70 ते 80 मीटरने वाढवण्यात येणार आहे. या कामानंतर 15 डब्यांच्या फास्ट लोकल या प्लॅटफॉर्मवरही थांबवता येणार आहेत.
हे काम विरार-मुंबई सेंट्रल पाचव्या आणि सहाव्या रेल्वे मार्गाच्या प्रकल्पाचा भाग आहे. याच प्रकल्पांतर्गत दादरहून परळच्या दिशेने सहावा मार्गही पुढे नेला जात आहे.
सध्या 12 डब्यांच्या लोकलसाठी सुमारे 270 मीटर लांबीचा प्लॅटफॉर्म पुरेसा असतो. मात्र 15 डब्यांच्या लोकलसाठी सुमारे 330 मीटर लांबी आवश्यक असते.
15 डब्यांच्या लोकलमध्ये तब्बल 4,380 प्रवासी प्रवास करू शकतात. सध्या दादरमध्ये 15 डब्यांच्या फास्ट लोकलसाठी प्लॅटफॉर्म क्रमांक 5 वापरला जातो.
प्लॅटफॉर्म 4 वाढवल्यानंतर 15 डब्यांच्या फास्ट लोकल तिथेही थांबवता येतील. त्यामुळे लोकलच्या हालचालीदरम्यान करावी लागणारी ऑपरेशनल जुळवाजुळव कमी होण्यास मदत होणार आहे.
या कामाचा दुसरा महत्त्वाचा भाग म्हणजे प्लॅटफॉर्म क्रमांक 5 सुमारे 70 ते 80 मीटरने कमी केला जाणार आहे.
रेल्वे अधिकाऱ्यांच्या म्हणण्यानुसार, प्लॅटफॉर्म 5 सध्या आवश्यकतेपेक्षा अधिक लांब असून त्याचा काही भाग सहाव्या रेल्वे मार्गाच्या नव्या अलाइनमेंटमध्ये अडथळा ठरत आहे.
त्यामुळे प्लॅटफॉर्म छोटा करून नव्या रेल्वे मार्गासाठी जागा उपलब्ध करून दिली जाणार आहे.
कामादरम्यान दादर स्थानकातील जुन्या फूट ओव्हर ब्रिजचा एक खांब नव्या रेल्वे मार्गाच्या कामाच्या जागेत येत आहे. त्यामुळे हा खांब हटवण्यात येणार आहे.
मात्र प्रवाशांची गैरसोय होऊ नये यासाठी नवीन FOB आधीच सुरू करण्यात आला असून तो मध्य रेल्वेच्या विद्यमान FOBला जोडण्यात आला आहे.
त्यामुळे बांधकाम सुरू असतानाही प्रवाशांची ये-जा सुरळीत राहण्याची अपेक्षा आहे.
पश्चिम रेल्वेच्या 15 डब्यांच्या लोकल सेवेसाठी दादरसोबतच विलेपार्ले, सांताक्रूझ, खार रोड आणि वांद्रे स्थानकांवरील प्लॅटफॉर्मची लांबी वाढवण्याचे काम सुरू आहे.
यामुळे 15 डब्यांच्या स्लो लोकल वांद्रेपर्यंत चालवण्याचा मार्ग मोकळा होणार आहे.
खार रोड स्थानकावरील काम पूर्ण झाले असून उर्वरित स्थानकांवरील कामही लवकरच पूर्ण होण्याची अपेक्षा आहे.
दादरमधील या बदलाचा फायदा केवळ उपनगरीय लोकल सेवेलाच होणार नाही.
15 डब्यांच्या फास्ट लोकल प्लॅटफॉर्म 4 वर हलवल्यानंतर प्लॅटफॉर्म 5 चा मेल आणि एक्स्प्रेस गाड्यांसाठी अधिक प्रभावीपणे वापर करता येणार आहे.
म्हणजेच, दादरमधील या प्रकल्पातून एकीकडे 15 डब्यांच्या लोकलमुळे प्रवासी क्षमता वाढवण्याचा प्रयत्न आहे, तर दुसरीकडे पाचव्या-सहाव्या रेल्वे मार्गामुळे अतिरिक्त ट्रॅक क्षमता निर्माण करून रेल्वे वाहतूक अधिक सुरळीत करण्याचे उद्दिष्ट आहे.
हेही वाचा