एमएमआरडीएने Mumbai Metropolitan Region Development Authority (MMRDA) मुंबई मेट्रो लाईन 9 मार्गावर प्रवाशांच्या सुरक्षिततेसाठी आणि वाहतूक सुलभ करण्यासाठी सात नवीन पादचारी पूल (FOB) उभारण्याचा निर्णय घेतला आहे. दहिसर पूर्व ते मीरा-भाईंदर या 11 किमी लांबीच्या मार्गावर आणि आठ मेट्रो स्थानकांजवळ हे पूल बांधले जाणार आहेत.
हे पूल MMRDA च्या मल्टी-मोडल इंटिग्रेशन (MMI) उपक्रमांतर्गत उभारले जात असून मेट्रो स्थानकांपर्यंत सुरक्षित, सोयीस्कर आणि अखंड प्रवास सुविधा उपलब्ध करून देणे हा यामागचा उद्देश आहे.
MMRDA च्या माहितीनुसार, या प्रकल्पाला 287 व्या कार्यकारी समितीची तसेच मुख्यमंत्री आणि उपमुख्यमंत्र्यांची मंजुरी मिळाली आहे. यापूर्वी मेट्रो लाईन 2A आणि 7 साठी राबवण्यात आलेल्या मल्टी-मोडल इंटिग्रेशनच्या धर्तीवर मेट्रो लाईन 9 साठीही ही योजना आखण्यात आली आहे.
हे FOB विशेषतः वेस्टर्न एक्स्प्रेस हायवे आणि मीरा-भाईंदर रोडवरील मोठ्या वाहतूक कोंडीच्या पार्श्वभूमीवर तयार करण्यात येणार आहेत. या रस्त्यांची रुंदी 30 ते 60 मीटर असल्याने आणि वाहतूक मोठ्या प्रमाणात असल्यामुळे पादचाऱ्यांच्या सुरक्षिततेसाठी स्वतंत्र पूल आवश्यक असल्याचे MMRDA ने म्हटले आहे.
या पुलांमुळे सिग्नलवरून रस्ता ओलांडण्याची गरज कमी होईल आणि वाहतुकीचा वेग सुधारण्यास मदत होईल.
या प्रकल्पासाठी M/s Speco Infrastructure JV आणि M/s PRS Infraprojects LLP यांची नियुक्ती करण्यात आली आहे. सात FOB बांधण्यासाठी सुमारे 82.09 कोटी रुपयांचे कंत्राट देण्यात आले आहे.
देवेंद्र फडणवीस (Devendra Fadnavis) यांनी सांगितले की, “मुंबईतील मेट्रो नेटवर्क वाढवताना प्रवाशांना सुरक्षित आणि सुलभ सुविधा देणेही तितकेच महत्त्वाचे आहे. मल्टी-मोडल इंटिग्रेशनमुळे नागरिकांना घर, कार्यालय आणि परिसरातून मेट्रो स्थानकांपर्यंत सहज पोहोचता येईल.”
उपमुख्यमंत्री एकनाथ शिंदे Eknath Shinde यांनी म्हटले की, “कोणतीही सार्वजनिक वाहतूक व्यवस्था तेव्हाच यशस्वी होते जेव्हा नागरिकांना ती सहज आणि सुरक्षितपणे वापरता येते. हे FOB मुंबई महानगर प्रदेश अधिक आधुनिक आणि जोडलेला बनवतील.”
दहिसर टोल नाका – 145 मीटर
मिरागाव – 87 मीटर
काशीगाव – 92 मीटर
शिवर गार्डन – 80 मीटर
मॅक्सस मॉल – 83 मीटर
वेज सागर हॉटेल – 88 मीटर
साईबाबा नगर – 80 मीटर
सर्व FOB मध्ये प्रवाशांच्या सोयीसाठी खालील सुविधा असतील:
जिने
लिफ्ट सुविधा
CCTV कॅमेरे
सर्व पुलांची रुंदी 3 मीटर असणार आहे.
हेही वाचा