मुंबई (mumbai) शहराला पाणीपुरवठा करणाऱ्या धरणांतील (dam) साठा कमी झाल्याने शहरातील पुरवठ्यात आधीच 10% पाणी कपात (water cut) केली होती.
या पार्श्वभूमीवर शहर पावसाची आतुरतेने वाट पाहत असतानाच, सात तलावांमधील एकूण पाणीसाठा चिंताजनक पातळीवर घसरला आहे. यामुळे पाणीटंचाईची भीती निर्माण झाली आहे.
10 जूनपर्यंत तलावांमधील एकूण पाणीसाठा केवळ 1.80 लाख दशलक्ष लिटर (एमएल) इतका शिल्लक होता. हा साठा एकूण क्षमतेच्या केवळ 12.49% इतका शिल्लक आहे.
महापालिका (bmc) अधिकाऱ्यांच्या म्हणण्यानुसार, अप्पर वैतरणामधील उपयुक्त पाणीसाठा पूर्णपणे संपला आहे. आता हे सरोवर केवळ राखीव साठ्यावरच टिकून आहे.
दररोज 440 एमएल पाणीपुरवठा करणाऱ्या तानसा सरोवरातील पाणीसाठा त्याच्या क्षमतेच्या केवळ 7% पर्यंत कमी झाला आहे. तर मध्य वैतरणा आणि भातसा सरोवरांमध्ये अनुक्रमे केवळ 15% आणि 11% पाणीसाठा शिल्लक आहे.
वाढत्या चिंतेच्या पार्श्वभूमीवरही, जलाशयांची सद्यस्थिती मागील वर्षांच्या तुलनेत बऱ्यापैकी चांगली आहे. गेल्या वर्षी याच कालावधीत तलावांमधील एकूण पाणीसाठा 10% होता, जो 2024 मध्ये 5.81% होता.
“परिस्थिती चिंताजनक असली तरी, वाढलेल्या पाणीसाठ्यामुळे मान्सूनला उशीर झाल्यास एक मोठा आधार मिळतो,” असे एका वरिष्ठ अधिकाऱ्याने सांगितले.
राज्य सिंचन विभागाने अप्पर वैतरणा आणि भातसा तलावांमधील अतिरिक्त 2.33 लाख एमएल राखीव पाणी वापरण्यास मंजुरी दिली आहे.
पालिकेच्या अधिकाऱ्यांनी सांगितले की, सातही तलावांमधील पाण्याची एकत्रित पातळी 8% पेक्षा कमी झाल्यासच या राखीव पाण्याचा वापर केला जाईल.
हेही वाचा