मुंबईच्या सार्वजनिक वाहतूक व्यवस्थेचा कणा असलेल्या BEST कर्मचाऱ्यांनी 18 ऑगस्टपासून बेमुदत उपोषणाला सुरुवात केली आहे.
वेतन करार, सातवा वेतन आयोग, वेट-लीज कर्मचाऱ्यांना समान वेतन आणि निवृत्त कर्मचाऱ्यांची प्रलंबित देणी अशा विविध मागण्यांसाठी हे आंदोलन छेडण्यात आलं आहे. प्रशासनाने मागण्यांवर ठोस निर्णय घ्यावा, यासाठी कर्मचाऱ्यांनी हा आक्रमक पवित्रा घेतला आहे.
ऑपेरा हाऊसमधील केनेडी ब्रिजजवळ असलेल्या BEST कामगार संघटनेच्या कार्यालयाबाहेर सकाळी 11.30 वाजता उपोषणाला सुरुवात झाली. BEST Workers’ Unionचे सरचिटणीस शशांक शरद राव यांनी मागण्या मान्य होईपर्यंत आंदोलन सुरूच राहणार असल्याचं सांगितलं.
कामगार संघटनेने वेतन, कर्मचारी सुविधा आणि BESTच्या आर्थिक स्थितीशी संबंधित अनेक मागण्या केल्या आहेत.
2016-21 आणि 2021-26 या कालावधीतील वेतन करार तातडीने अंतिम करावेत.
कर्मचाऱ्यांना 7वा वेतन आयोग लागू करावा.
BEST कर्मचाऱ्यांच्या वेतनश्रेणी BMC कर्मचाऱ्यांप्रमाणे कराव्यात.
समान कामासाठी खासगी कंपन्यांमार्फत काम करणाऱ्या वेट-लीज कर्मचाऱ्यांना समान वेतन द्यावं.
विद्युत पुरवठा विभागात सुरुवातीला कंत्राटी किंवा रोजंदारी पद्धतीने नियुक्त होऊन नंतर कायम झालेल्या कर्मचाऱ्यांच्या वेतनातील तफावत दूर करावी.
निवृत्त BEST कर्मचाऱ्यांना ग्रॅच्युइटी आणि इतर प्रलंबित देणी तातडीने द्यावीत.
जून 2019 मध्ये झालेल्या सामंजस्य कराराची (MoU) अंमलबजावणी करावी.
BESTच्या कारभारासाठी BMCने तातडीने आर्थिक मदत उपलब्ध करून द्यावी.
BESTची आर्थिक स्थिती सुधारण्यासाठी BESTचा अर्थसंकल्प BMCच्या अर्थसंकल्पात विलीन करावा.
BEST कर्मचाऱ्यांच्या मागण्यांवर गेल्या काही महिन्यांपासून चर्चा सुरू असली तरी ठोस तोडगा न निघाल्याचा संघटनेचा दावा आहे.
यापूर्वी जूनमध्ये BEST कर्मचाऱ्यांनी तीन दिवसांचा संप केला होता. या संपामुळे मुंबईतील बससेवेवर मोठा परिणाम झाला होता. महाराष्ट्र सरकारच्या प्रतिनिधींशी चर्चा झाल्यानंतर हा संप मागे घेण्यात आला.
त्यावेळी कायमस्वरूपी BEST कर्मचाऱ्यांना दरमहा 3,000 आणि वेट-लीज कर्मचाऱ्यांना 2,000 अंतरिम वाढ देण्याची घोषणा करण्यात आली होती. तसेच प्रलंबित ग्रॅच्युइटीचा प्रश्न आर्थिक वर्षात सोडवण्याचं आश्वासन देण्यात आलं होतं.
मात्र, ही अंतरिम आर्थिक मदत म्हणजे अंतिम वेतन कराराचा पर्याय नाही, अशी भूमिका संघटनेने घेतली आहे.
कर्मचाऱ्यांच्या आंदोलनामागे BESTची आर्थिक स्थिती हा देखील मोठा मुद्दा आहे.
2026-27च्या BMC अर्थसंकल्पात BESTला 1,000 कोटींची आर्थिक तरतूद करण्यात आली आहे. मात्र BESTने सुमारे 4,000 कोटींच्या आर्थिक मदतीची मागणी केली होती.
BESTने 2026-27 या आर्थिक वर्षासाठी सुमारे 2,439 कोटींचा तोटा अपेक्षित असल्याचं सांगितलं आहे. BESTचा बस ताफा, कर्मचारी खर्च आणि दैनंदिन ऑपरेशनल खर्च सुरळीत ठेवण्यासाठी अधिक आणि सातत्यपूर्ण आर्थिक मदत आवश्यक असल्याचा प्रशासनाचा दावा आहे.
यामुळे BEST कामगार संघटनेने BMCकडून दीर्घकालीन आणि स्थिर आर्थिक व्यवस्था करण्याची मागणी केली आहे.
BEST ही मुंबईच्या सार्वजनिक वाहतूक व्यवस्थेतील महत्त्वाची सेवा आहे. सध्या BESTकडे सुमारे 2,800 बस कार्यरत असून त्यातील मोठा हिस्सा वेट-लीज पद्धतीने चालवला जातो.
BESTने आपल्या ताफ्यात मोठ्या प्रमाणात इलेक्ट्रिक बस दाखल करण्याची योजना आखली आहे. त्यामध्ये स्वतःच्या ताफ्यासाठी 5,000 इलेक्ट्रिक बस आणि वेट-लीज पद्धतीने आणखी 1,500 इलेक्ट्रिक बस घेण्याचा प्रस्ताव आहे.
मात्र आता सुरू झालेल्या बेमुदत उपोषणाला अधिक कर्मचाऱ्यांचा पाठिंबा मिळाल्यास किंवा आंदोलन तीव्र झाल्यास मुंबईतील BEST बससेवेवर परिणाम होण्याची शक्यता आहे.
BEST Workers’ Unionने स्पष्ट केलं आहे की, कर्मचाऱ्यांच्या मागण्यांवर ठोस निर्णय होईपर्यंत बेमुदत आंदोलन सुरूच राहणार आहे.
हेही वाचा