हा निर्णय सर्वोच्च न्यायालय, रेल्वे बोर्ड आणि पश्चिम रेल्वे मुख्यालयाच्या निर्देशांनुसार घेण्यात आला आहे. स्थानकांवरील भटक्या कुत्र्यांमुळे होणाऱ्या घटनांना आळा घालणे आणि प्रवाशांसाठी सुरक्षित वातावरण निर्माण करणे हा त्यामागील उद्देश आहे.
मुंबई सेंट्रल येथील वरिष्ठ विभागीय वाणिज्य व्यवस्थापकांनी जारी केलेल्या आदेशानुसार, प्रत्येक स्थानक प्रमुखाला पुढील जबाबदाऱ्या पार पाडाव्या लागतील:
स्थानक परिसरातील भटक्या कुत्र्यांवर नियमित देखरेख ठेवणे.
महापालिकेसह समन्वय साधून कुत्र्यांचे नियंत्रण आणि स्थलांतराची कार्यवाही करणे.
प्लॅटफॉर्म आणि स्थानक परिसरात प्राणी प्रवेश करू नयेत यासाठी प्रतिबंधात्मक उपाययोजना करणे.
नियमित तपासणी करून आवश्यक कारवाई करणे.
केलेल्या कारवाईची नोंद ठेवून विभागीय कार्यालयाला अहवाल सादर करणे.
रेल्वे बोर्ड आणि सर्वोच्च न्यायालयाच्या मार्गदर्शक सूचनांची प्रभावी अंमलबजावणी सुनिश्चित करणे.
प्रवाशांना तक्रार करणे सोपे व्हावे यासाठी नोडल अधिकाऱ्यांची नावे आणि संपर्क क्रमांक प्रत्येक स्थानकाच्या प्रवेशद्वारावर प्रदर्शित करण्यात येणार आहेत. त्यामुळे भटक्या कुत्र्यांबाबतची तक्रार प्रवासी थेट संबंधित अधिकाऱ्यांकडे करू शकतील.
या उपक्रमामुळे महापालिकेशी समन्वय अधिक प्रभावी होईल. तक्रारींवर जलद कारवाई करता येईल आणि मुंबई उपनगरीय रेल्वे स्थानकांवरील सुरक्षा व्यवस्था अधिक मजबूत होईल, असा पश्चिम रेल्वेला विश्वास आहे. या निर्णयामुळे स्थानके अधिक स्वच्छ, सुरक्षित आणि प्रवाशांसाठी अनुकूल बनवण्यास मदत होणार आहे.
हेही वाचा