मुंबईतील चर्चगेट परिसरातील प्रसिद्ध K. Rustom & Co. या आइसक्रीम पार्लरवर महाराष्ट्र अन्न व औषध प्रशासनाने (FDA) मोठी कारवाई केली आहे. अन्न सुरक्षा नियमांचे गंभीर उल्लंघन आढळल्याने FDAने या आस्थापनाचा अन्न व्यवसाय परवाना तात्काळ निलंबित केला आहे.

FDAने गेल्या दोन दिवसांत चर्चगेट येथील वीर नरिमन रोडवरील ब्रेबॉर्न स्टेडियम हाऊसमधील K. Rustom & Co. येथे तपासणी केली. या तपासणीत अन्न सुरक्षा व स्वच्छतेसंदर्भातील अनेक गंभीर त्रुटी आढळून आल्या. या त्रुटींमुळे ग्राहकांच्या आरोग्याला धोका निर्माण होऊ शकतो, असे FDAने म्हटले आहे.

तपासणीत काय आढळले?

FDAच्या तपासणीदरम्यान आस्थापनात अनेक धक्कादायक बाबी समोर आल्या.

• आस्थापनात जिवंत उंदीर आणि माश्या आढळल्या.

• Cold Chain व्यवस्थापनात गंभीर त्रुटी आढळल्या.

• अन्न सुरक्षा कायद्यानुसार आवश्यक असलेल्या नोंदी व रेकॉर्ड ठेवलेले नव्हते.

• Expired अन्नपदार्थ साठवून ठेवण्यात आले होते.

या सर्व बाबी अन्न सुरक्षा व स्वच्छतेच्या नियमांचे गंभीर उल्लंघन असल्याचे FDAने नमूद केले आहे.

परवाना निलंबित

अन्न सुरक्षा व मानके कायदा, 2006 (Food Safety and Standards Act, 2006) मधील कलम 32(3) अंतर्गत FDAने K. Rustom & Co. चा अन्न व्यवसाय परवाना तात्काळ निलंबित करण्याचे आदेश दिले आहेत.

यामुळे संबंधित आस्थापनाला सर्व त्रुटी दूर करून FDAच्या निर्धारित अन्न सुरक्षा निकषांचे पालन करेपर्यंत व्यवसाय सुरू ठेवता येणार नाही.

राज्यभरात FDAची मोहीम

राज्यातील खाद्यपदार्थ विक्री केंद्रांमधील अस्वच्छता आणि अन्न सुरक्षा नियमांचे उल्लंघन रोखण्यासाठी FDAने विशेष तपासणी मोहीम सुरू केली आहे. ग्राहकांच्या आरोग्याच्या दृष्टीने नियमांचे काटेकोर पालन व्हावे, यासाठी विविध खाद्य आस्थापनांवर छापे आणि तपासण्या सुरू असल्याचे प्रशासनाने स्पष्ट केले आहे.

चर्चगेटमधील K. Rustom & Co. हे मुंबईतील सर्वात जुने आणि प्रसिद्ध आइसक्रीम पार्लर असून, त्यांच्या हस्तनिर्मित आइसक्रीम सँडविचसाठी हे ठिकाण अनेक दशकांपासून मुंबईकरांमध्ये लोकप्रिय आहे.

हेही वाचा

मुंबई: अनधिकृत बांधकाम आणि हॉटेल्सवर कारवाई होणार