मुंबईसह आसपासच्या परिसरात मुसळधार पावसानं हजेरी लावली आहे. मुंबईत मुसळधार ते अति मुसळधार पावसाची शक्यता असल्यानं सतर्क राहण्याचा इशारा हवामान विभागाकडून देण्यात आला आहे. सध्यस्थितीत विजांच्या कडकडाटासह पाऊस कोसळत असून, सखल भागात पाणी साचण्याची शक्यता आहे.
मुंबईच्या दादर, परळ, लालबाग, माटुंगा, अंधेरी, सायन, कुर्ला, मालाड, बोरिवली यांसह अनेक भागात जोरदार पावसानं हजेरी लावली आहे. त्याशिवाय, राज्यात अनेक भागांना परतीच्या पावसाचा तडाखा बसला आहे. पुणे, कोल्हापूर, सांगली, सोलापूर या जिल्ह्यांत पावसाचा सर्वाधिक जोर आहे.
मुंबईत पावसाचा जोर कायम राहिल्यास रस्ते व रेल्वे वाहतूक विस्कळीत होण्याची शक्यता आहे. तसंच, यापूर्वीच हवामान खात्याने मुसळधार पावसाचा अंदाज वर्तवला होता तसेच ही परिस्थिती पुढील चार-पाच दिवस राहणार असल्याची शक्यताही हवामान खात्याने वर्तवली होती.