मुंबईतील गिरण्यांचा इतिहास, त्याच्याशी निगडीत विविध पैलूंचे दर्शन मुंबई महापालिकेच्या कापड गिरणी संग्रहालयातून (टेक्सटाइल म्युझिअम) घडणार आहे. या प्रकल्पाच्या पहिल्या टप्प्याचे सात हजार चौरस मीटर जागेतील ९० टक्क्यांहून अधिक काम पूर्ण झाले आहे. भायखळ्यातील काळा चौकी येथे दी इंडिया युनायटेड मिल क्रमांक-२ आणि ३च्या जागेवर हे संग्रहालय उभे राहत आहे.
संग्रहालयात मल्टिमीडिया म्युझिकल फाऊंटन थ्रीडी शोसह अन्य आकर्षणे आहेत. फाऊंटन शोसाठी मिलमधील तलावाची स्वच्छता व अन्य कामांसाठी निविदा काढण्यात आली आहे. लवकरच हे कामही सुरू होणार आहे. पहिला टप्पा गणेशोत्सवानंतर म्हणजेच ऑक्टोबर किंवा नोव्हेंबरमध्ये सुरू केला जाईल, अशी माहिती पालिकेतील वरिष्ठ अधिकाऱ्यांनी दिली.
हे संग्रहालय उभारण्याचा निर्णय २०११मध्ये घेण्यात आला होता. यासाठी ४४ हजार चौरस मीटर जागा लागणार असून, त्यापैकी शेवटची १० हजार चौरस मीटर जागा पालिकेला राष्ट्रीय वस्त्रोद्योग महामंडळाकडून मिळणार आहे. त्याची प्रक्रिया सुरू आहे. हे संग्रहालय दोन टप्प्यांत होणार आहे.
पहिल्या टप्प्यात प्रामुख्याने फाऊंटन शो हे पर्यटकांसाठी विशेष आकर्षण असणार आहे. यातून गिरण्यांचा इतिहास आणि मुंबईतील अन्य पर्यटनाचे दर्शन घडवण्यात येणार आहे. पहिल्या टप्प्यात संग्रहालयात येणाऱ्या पर्यटकांना मिलच्या जागेतच वाहनतळ उपलब्ध केला जाणार आहे.
संग्रहालयातील दुसरा टप्पा यशावकाश पूर्ण होणार आहे. ४४पैकी ३४ हजार चौरस मीटर जागेत गिरण्यांचे संग्रहालय उभारतानाच वाचनालय, सभागृह, कलाप्रदर्शन आदींसाठी अंतर्गंत बदल करून पुरातन वास्तूचे संवर्धन करण्याचा प्रस्ताव आहे. मात्र १० हजार चौरस मीटर जागा अद्यापही पालिकेला मिळालेली नाही. त्याची प्रक्रिया सुरू असल्याचे सांगण्यात आले.
आकर्षक प्रवेशद्वार, येणाऱ्यांना फिरण्यासाठी मोकळी जागा, आसने, आकर्षक रोषणाई, फूड कोर्ट इत्यादी सुविधा पर्यटकांसाठी संग्रहालयात उपलब्ध असतील. याच्या तिकीटाचा निर्णय पालिकेच्या प्रशासकीय पातळीवर लवकरच घेण्यात येणार आहे.
हेही वाचा