शिवसेनेच्या एका नगरसेवकाच्या नेतृत्वाखाली हा हल्ला झाल्याचा आरोप असून, या घटनेमुळे राज्यभरातील वैद्यकीय क्षेत्रात संतापाची लाट उसळली आहे. याप्रकरणी योग्य कारवाई न झाल्यास 72 तासांत देशव्यापी आंदोलन छेडण्याचा इशारा UDF ने दिला आहे.
UDFचे अध्यक्ष डॉ. लक्ष्य मित्तल यांनी सांगितले की, या घटनेनंतर संघटनेने तातडीने महाराष्ट्राचे मुख्यमंत्री, अतिरिक्त मुख्य सचिव (गृह), ठाणे पोलीस आयुक्त आणि अतिरिक्त पोलीस आयुक्त यांना पत्र पाठवून एफआयआर नोंदवून सर्व आरोपींना तात्काळ अटक करण्याची मागणी केली आहे.
डॉ. मित्तल म्हणाले, "आरोपी हा लोकप्रतिनिधी असल्याने निष्पक्ष कारवाई होणे आव्हानात्मक ठरू शकते. जर लोकप्रतिनिधीच अशा प्रकारच्या हिंसाचारात सहभागी होत असतील, तर समाजात चुकीचा संदेश जातो आणि विशेषतः तरुण डॉक्टरांमध्ये भीतीचे वातावरण निर्माण होते."
त्यांनी या प्रकरणाची पारदर्शक आणि निश्चित कालमर्यादेत चौकशी करण्याची तसेच आरोपी कोणत्याही पदावर असला तरी त्याच्यावर कठोर कारवाई करण्याची मागणी केली.
"आरोग्य कर्मचाऱ्यांवरील हिंसाचार अजिबात सहन केला जाणार नाही, असा स्पष्ट संदेश सरकारने द्यायला हवा. अशा घटना पुन्हा घडू नयेत यासाठी तातडीची कारवाई आवश्यक आहे," असे डॉ. मित्तल यांनी नमूद केले.
यासोबतच UDF ने सरकारला 72 तासांचा अल्टिमेटम दिला आहे. या कालावधीत एफआयआर दाखल करून आरोपींना अटक न झाल्यास आंदोलन अधिक तीव्र केले जाईल आणि ते महाराष्ट्रापुरते मर्यादित न ठेवता देशव्यापी आंदोलन करण्यात येईल, असा इशाराही त्यांनी दिला.
यापूर्वीही UDF ने निवेदन जारी करून शास्त्रीनगर रुग्णालयातील डॉक्टर, परिचारिका आणि इतर आरोग्य कर्मचाऱ्यांना पाठिंबा दर्शवला होता. जीव वाचवण्यासाठी अहोरात्र सेवा देणाऱ्या वैद्यकीय कर्मचाऱ्यांवरील हिंसाचार अस्वीकार्य आहे. डॉक्टरांवरील हल्ल्यांच्या वाढत्या घटनांमुळे त्यांच्या सुरक्षेसाठी अधिक कडक उपाययोजना करण्याची गरज असल्याचे संघटनेने आपल्या पत्रात नमूद केले आहे.
हेही वाचा