मुंबई (mumbai) मेट्रो लाईन 3 किंवा ‘अक्वा लाईन’वर (Aqua line) पादचारी कनेक्टिव्हिटी अधिक बळकट करण्यासाठी MMRCL ने दोन मोठे सबवे उभारण्याची योजना जाहीर केली आहे.
या सबवेमुळे मेट्रो स्टेशनना महत्त्वाच्या शेजारील परिसरांशी, सार्वजनिक स्थळांशी आणि आगामी प्रकल्पांशी थेट जोडणी मिळणार आहे. मेट्रो 3 च्या उपयुक्ततेत मोठी वाढ होणार आहे.
प्रस्तावित दोन सबवेंपैकी पहिला सबवे वरळीमध्ये नेहरू सायन्स सेंटर मेट्रो स्टेशनला जोडला जाणार आहे. हा सबवे महालक्ष्मी रेसकोर्स, वरळी प्रोमेनेड आणि नेहरू प्लॅनेटोरियमपर्यंत बांधला जाणार आहे.
यासोबतच कोस्टल रोडलगत उभारत असलेल्या नव्या बागेला आणि पूर्वी वरळी डेअरी असलेल्या जागेवर उभारण्यात येणाऱ्या व्यावसायिक केंद्राला देखील हा मार्ग जोडणार आहे. हा सबवे 1.6 किलोमीटर लांबीचा असेल.
दुसरा सबवे बांद्रा-कुर्ला कॉम्प्लेक्स (BKC) स्टेशनला जोडणार आहे. तो 1.4 किलोमीटर लांबीचा असेल. हा सबवे प्रवाशांना थेट मुंबई-अहमदाबाद बुलेट ट्रेन टर्मिनलशी जोडेल.
BKC परिसरातील महत्त्वाच्या ठिकाणांशीही हा मार्ग समन्वय साधेल, ज्यामुळे हा भाग एक प्रमुख इंटरचेंज हब म्हणून विकसित होणार आहे.
या दोन्ही सबवेंची लांबी मिळून 3 किलोमीटरपेक्षा अधिक असणार आहे. MMRCLचे संचालक आर. रमणा यांनी सांगितले की, “एकूण 3 किमी लांबीवर पसरलेल्या या दोन पादचारी व्हेस्टिब्यूल्स किंवा सबवेंसाठी DPR तयार करण्यासाठी आम्ही लवकरच एका एजन्सीची नियुक्ती करू. हीच एजन्सी बांधकाम काळात प्रकल्प व्यवस्थापन सल्लागार म्हणूनही काम करणार आहे.”
या संपूर्ण योजनेतील एक महत्त्वाचा भाग म्हणजे वरळी डेअरीचा विशाल भूखंड. हा भूखंड आता व्यावसायिक वापरासाठी खुला होणार असल्याचे संकेत शासकीय पातळीवरून मिळाले आहेत.
अधिकाऱ्यांच्या म्हणण्यानुसार, राज्य शहरी विकास विभाग डेव्हलपमेंट कंट्रोल अँड प्रमोशनल रेग्युलेशन्स (DCPR) मध्ये आवश्यक बदल करणार आहे. वरळी डेअरी प्लॉटचे आरक्षण व्यावसायिक वापरासाठी बदलले जाणार आहे.
या क्षेत्रासाठी मुंबई महानगर प्रदेश विकास प्राधिकरण (MMRDA)ला नियोजन प्राधिकरण म्हणून आधीच नियुक्त करण्यात आले आहे. त्यामुळे या जागेचे पुनर्विकास काम गतीने होण्याची अपेक्षा आहे.
हेही वाचा