महाराष्ट्राच्या अन्न आणि औषध प्रशासनाने (एफडीए) धारावी येथील झेप्टोच्या सुविधेचा अन्न व्यवसाय परवाना रद्द केला आहे. कारण अचानक केलेल्या तपासणीत अन्न सुरक्षा नियमांचे उल्लंघन केल्याचे आढळून आले.
एफडीए अधिकाऱ्यांच्या म्हणण्यानुसार, धारावी येथील तपासणीत अस्वच्छता आणि असुरक्षित अन्न साठवणुकीची परिस्थिती आढळून आली.
काही अन्नपदार्थांमध्ये बुरशी लागल्याचे आढळले होते. तर काही साचलेल्या पाण्याजवळ साठवण्यात आले होते. शीतगृहे आवश्यक तापमान राखत नव्हती आणि फरशी घाणेरडी आणि ओली होती.
एक्सपायर डेट झालेले अन्नपदार्थ ताज्या साठ्यापासून स्पष्टपणे वेगळे न केलेले आढळले. एफडीए राज्यमंत्री योगेश कदम यांच्याकडून मिळालेल्या माहितीवरून ही तपासणी करण्यात आली.
या निष्कर्षांवर आधारित, सहाय्यक आयुक्त, अन्न, अनुपमा बाळासाहेब पाटील यांनी अन्न सुरक्षा आणि मानके कायदा, 2006 च्या कलम 32(3) अंतर्गत सुविधेचा परवाना निलंबित करण्याचे आदेश दिले.
झेप्टो सर्व समस्या सुधारत नाही आणि परवाना प्राधिकरणाकडून मंजुरी मिळवत नाही तोपर्यंत हे निलंबन लागू राहील.
झेप्टोला भिवंडी, वांद्रे पूर्व आणि बोरिवली येथील सुविधांमध्ये देखील तपासणीचा सामना करावा लागला आहे.
भिवंडी आणि वांद्रे पूर्व येथील परवाने रद्द करण्यात आले नसले तरी, उल्लंघनांसाठी नोटीस बजावण्यात आल्या आहेत.
बोरिवलीमध्ये, परवाना तात्पुरता निलंबित करण्यात आला होता, परंतु सुधारात्मक उपाययोजना केल्यानंतर आणि अप्राधिकरणाने मंजूर केल्यानंतर कामकाज पुन्हा सुरू करण्यात आले.
झेप्टोच्या प्रवक्त्याने सांगितले की, "आम्ही आधीच अंतर्गत पुनरावलोकन सुरू केले आहे आणि समस्यांचे जलद निराकरण करण्यासाठी अधिकाऱ्यांसोबत काम करत आहोत."
झेप्टोसाठी हा पहिला वाद नाही. कंपनीने अलीकडेच डिलिव्हरी शुल्क वाढवल्याचा आणि तिच्या अॅपवर फसव्या पद्धती वापरल्याचा आरोप ग्राहकांकडून केला जात होता. सोशल मीडियावर वापरकर्त्यांकडून कंपनीबद्दल निराशा व्यक्त करणाऱ्या तक्रारींमध्ये वाढ झाली आहे.
हेही वाचा