बाद फेरीत स्थान मिळवण्यासाठी ‘करो या मरो’ अशी स्थिती येऊन ठेपल्यानंतर मुंबई इंडियन्स संघ आता खडबडून जागा झाला आहे. कोलकाता नाइट रायडर्सविरुद्धच्या महत्त्वपूर्ण लढतीत सुरुवात काहीशी संथ झाल्यानंतर युवा फलंदाज इशान किशनने कोलकाताच्या गोलंदाजांची अक्षरश: पुंगी वाजवली. त्यानंतर गोलंदाजांनी केलेल्या सुरेख कामगिरीनुळे मुंबई इंडियन्सने कोलकाता नाइट रायडर्सवर १०२ धावांनी दणदणीत विजय मिळवला. मुंबई इंडियन्सने आता गुणतालिकेत १० गुणांसह चौथ्या स्थानी झेप घेतली असून कोलकाताला पाचव्या स्थानी फेकले आहे.
सूर्यकुमारचा सूर्य पुन्हा तळपला
आयपीएल २०१८ मध्ये मुंबई इंडियन्ससाठी सातत्यपूर्ण कामगिरी करणारा एकमेव खेळाडू म्हणजे मुंबईकर सूर्यकुमार यादव. कोलकाताविरुद्धच्या सामन्यातही सूर्यकुमारने इर्विन लुइसच्या साथीने मुंबईला चांगली सुरुवात करून दिली. मात्र लुइसपाठोपाठ सूर्यकुमार (३६) माघारी परतल्यामुळे मुंबई संघ काहीसा अडचणीत सापडला होता. तिसऱ्या क्रमांकावर फलंदाजीस उतरलेला कर्णधार रोहित शर्माला सूर गवसत नव्हता. त्यामुळे मुंबईची अवस्था ९ षटकांत २ बाद ६२ अशी झाली होती.
इशानचे १७ चेंडूंत अर्धशतक
इशान किशन मैदानात उतरल्यानंतर खऱ्या अर्थाने प्रेक्षकांच्या आनंदाला उधाण आले. त्याने चौकार-षटकारांची आतषबाजी केल्यामुळे संथ गतीने धावणारा मुंबईचा धावफलक बुलेट ट्रेनसारखा धावू लागला. इशानने अवघ्या १७ चेंडूंत अर्धशतकाला गवसणी घातली. त्याने २१ चेंडूंत ५ चौकार आणि ६ षटकारांची बरसात केल्यामुळे मुंबईला २० षटकांत ६ बाद २१० धावा उभारता आल्या. बेन कटिंगनेही ९ चेंडूंत ३ षटकार ठोकत २४ धावांचे योगदान दिले.
कोलकाताची सुरुवातीपासूनच पडझड
मुंबईचे २११ धावांचे उद्दिष्ट गाठताना कोलकाता नाइट रायडर्सची सुरुवात खराब झाली. दुसऱ्याच चेंडूवर मिचेल मॅकक्लेनाघनने सुनील नरिनचा (४) अडसर दूर केला. ख्रिस लिन (२१) आणि रॉबिन उथप्पा (१४) यांनी कोलकाताचा डाव सावरण्याचा प्रयत्न केला. पण दोघेही माघारी परतल्यानंतर कोलकाताच्या डावाला उतरती कळा लागली.
कृणाल-हार्दिकची जुगलबंदी
कोलकाताचे फलंदाज एकापाठोपाठ माघारी परतत असताना विकेट मिळवण्यासाठी कृणाल आणि हार्दिक या पंड्या बंधूंमध्ये जुगलबंदी पाहायला मिळाली. हार्दिकने पहिल्यांदा आंद्रे रस्सेल (२) आणि नितीश राणा (२१) यांना पॅव्हेलियनचा रस्ता दाखवला. त्यानंतर कृणालने टॉम कुरान (१८) आणि कुलदीप यादव (५) यांना बाद करत मुंबई इंडियन्सच्या विजयावर शिक्कामोर्तब केले. कोलकाताचा डाव १८.१ षटकांत १०८ धावांवर संपुष्टात आणत मुंबई इंडियन्सने १०२ धावांनी विजय साकारला.