मुंबई पोलिस गुन्हे शाखेने बृहन्मुंबई महानगरपालिका (BMC) आरोग्य विभागाच्या समन्वयाने कारवाई करत शिवाजीनगर-गोवंडी परिसरात बोगस डॉक्टर म्हणून प्रॅक्टिस करणाऱ्या दोन जणांना अटक केली आहे. या कारवाईमुळे नागरिकांच्या आरोग्याशी खेळ करणाऱ्या गैरप्रकारांचा पर्दाफाश झाला आहे.
गुन्हे शाखेच्या युनिट 6 ला मिळालेल्या गुप्त माहितीनुसार, शिवाजीनगर आणि गोवंडी भागात काही व्यक्ती कोणतीही वैद्यकीय पदवी किंवा पात्रता नसताना क्लिनिक चालवत होते. यानंतर पोलिसांनी BMC च्या एम-ईस्ट वॉर्ड (देवनार) येथील सहाय्यक वैद्यकीय अधिकाऱ्यासोबत संयुक्त कारवाई करत शिवाजीनगरमधील दोन क्लिनिकवर छापे टाकले.
या कारवाईत राजीव कपिलदेव राजन (३४) आणि कुबेरनाथ गोमती यादव (५६) या आरोपींना अटक करण्यात आली. हे दोघेही रुग्णांची तपासणी करून इंजेक्शन, अँटिबायोटिक्ससह उपचार देत होते आणि त्यासाठी मोठ्या प्रमाणात फी आकारत होते.
पोलिस तपासात समोर आले की, दोन्ही आरोपींकडे कोणताही वैध वैद्यकीय परवाना नव्हता आणि ते महाराष्ट्र मेडिकल कौन्सिल कडे नोंदणीकृत नव्हते. तरीही ते स्वतःला पात्र डॉक्टर म्हणून भासवून रुग्णांची फसवणूक करत होते.
छाप्यादरम्यान पोलिसांनी इंजेक्शनच्या बाटल्या, सिरिंज, अँटिबायोटिक गोळ्या आणि इतर औषधांचा साठा जप्त केला असून पंचनामा करण्यात आला आहे.
या प्रकरणी शिवाजीनगर पोलिस ठाण्यात वैद्यकीय व्यवसाय कायदा 1961 च्या कलम 33 आणि 36 अंतर्गत दोन वेगवेगळे गुन्हे दाखल करण्यात आले आहेत. ही कारवाई युनिट 6 चे पोलिस निरीक्षक भरत घोणे यांच्या नेतृत्वाखाली पार पडली.
दरम्यान, राज्य सरकारने मार्च महिन्यात बोगस डॉक्टर आणि अनधिकृत नर्सिंग होम्सवर नियंत्रण ठेवण्यासाठी विशेष समिती स्थापन करण्याची घोषणा केली होती. ही समिती बेकायदेशीररित्या वैद्यकीय व्यवसाय करणाऱ्या व्यक्तींची ओळख पटवणार आहे.
तसेच, अशा प्रकारच्या गुन्ह्यांवर कडक कारवाई करण्यासाठी विद्यमान कायद्यात दुरुस्ती करून दंड आणि शिक्षेमध्ये वाढ करण्याचाही सरकारचा विचार आहे.