पोलिसांवर वारंवार हल्ले होत असल्याची घटना ताजी असतानाच शिवडी येथे नाकाबंदीवेळी एका तरुणाने पोलिसाच्या अंगावरून दुचाकी नेल्याचा धक्कादायक प्रकार समोर आला आहे. या दुर्घनेटत शिवडी पोलिस ठाण्याचे अमलदार रेडकर जखमी झाले आहेत. याप्रकरणी दुचाकी चालक फैजल नझीर वाडकर याच्याविरोधात शिवडी पोलिसांनी गुन्हा नोंदवला असून त्याला अटक केली आहे.
नेमकं प्रकरण काय?
फैजल नाझीर वाडकर हा शिवडीतल्या कौला बंदर झोपडपट्टी परिसारत राहतो. सोमवारी रात्री ११ वा. सुमारास ब्रिटानिया जंक्शन येथे नाकाबंदी चालू होती. यावेळी शिवडी पोलिस ठाण्याचे अमलदार तिथे पोलिस गस्तीवर होते. त्यावेळी फैजल विना हॅल्मेट दुचाकी घेऊन जात असताना नाकाबंदीत असलेल्या पोलिसांनी त्याला अडवले. यावेळी पोलिसांनी त्याला थांबायला सांगितलं होतं. मात्र, त्याने दुचाकी न थांबवता पोलिसांच्या अंगावर चढवली. त्यामध्ये आमलदार रेडकर यांना किरकोळ दुखापत झाली. उपचारासाठी त्यांना जेजे रुग्णालयात नेण्यात आलं आहे.
या कलमांतर्गत गन्हा दाखल
फैजल याच्याकडे परवाना आणि इतर कागदपत्रे नव्हती. तसेच पोलिसांच्या अंगावर दुचारी नेल्याने त्याच्यावर कलम ३५३, कलम २७९, कलम ३३७, कलम ५०४ भा.दं.वि.सह कलम १२९, कलम १५८/१७७, कलम ३/१८१ मो.वा.का. अन्वये गुन्हा दाखल करण्यात आला आहे.