मानखुर्द परिसरात राहणाऱ्या तरुणीला प्रेमाच्या जाळ्यात अडकवून प्रियकराने उरणमध्ये ठार केले. या घटनेनंतर मानखुर्दमध्ये संताप व्यक्त केला जात असून आरोपींवर कडक कारवाई करावी, अशी मागणी रहिवाशांकडून केली जात आहे.
उरणमधील चिरनेर-खारपाडा रस्त्यावर या तरुणीचा मृतदेह पोत्यात सापडला होता. निजामुद्दीन शेख (२७) असे आरोपीचे नाव असून मानखुर्द पोलिसांनी आरोपीला ताब्यात घेऊन नंतर उरण पोलिसांच्या ताब्यात दिले.
मुलगी मानखुर्द येथील अण्णाभाऊ साठे नगर परिसरात राहत होती. आरोपी हा टॅक्सी चालक असून तो शिवाजीनगर ते नागपाडा दरम्यान टॅक्सी चालवत असे. मृत तरुणीही घरकामासाठी नागपाडा येथे जात असे. चार वर्षांपूर्वी दोघांची भेट झाली आणि ओळखीचे रुपांतर प्रेमात झाले.
मयत युवती १८ एप्रिल रोजी कामावर गेली होती. दुपारी तिने भावाला फोन करून रात्री उशिरा येणार असल्याची माहिती दिली. पण ती घरी परतलीच नाही. सर्वत्र शोध घेऊनही ती सापडली नाही. त्यामुळे तिच्या आईने 19 एप्रिल रोजी मानखुर्द पोलिस ठाण्यात हरवल्याची तक्रार दाखल केली.
मृत मुलीचा शोध घेत असताना पोलिसांनी 24 एप्रिल रोजी निजामुद्दीनला चौकशीसाठी बोलावले. त्यानंतर दुसऱ्याच दिवशी मृत तरुणीचा मृतदेह उरणमध्ये सापडला. दरम्यान, लग्नाचे आमिष दाखवून आरोपीने तिला आठ दिवसांपूर्वी 18 एप्रिल रोजी कल्याणमधील खडवली परिसरात नेले. तेथे काही दिवस राहिल्यानंतर आरोपीने तिची गळा आवळून हत्या केली. त्यानंतर तिचा मृतदेह गोणीत भरून उरणमधील चारनेर-तिघाटी रस्त्यावर फेकून दिल्याचे पोलिस तपासात उघड झाले आहे.
मूळचे उत्तर प्रदेशातील निजामुद्दीनचे मुंबईत राहण्याचे ठिकाण नाही. तो टॅक्सी चालवून कुठेही राहायचा. विशेष म्हणजे निजामुद्दीन विवाहित असून त्याची पत्नी गावात राहते.
हेही वाचा