मद्यधुंद तरुणांवर कारवाई करण्यासाठी गेलेल्या पोलिसाचे तरुणांनीच अपहरण केल्याची घटना मंगळवारी पूर्व द्रुतगती मार्गावर घडली. या प्रकरणी टिळक नगर पोलिसांनी दोघांना ठाणे परिसरातून अटक केली आहे. विराज शरद शिंदे (२१), गौरव मनोज पंजवाने(२९) अशी या दोघांची नावे आहेत. या दोघांचा तिसरा साथीदार फरार असून पोलिस त्याचा शोध घेत आहेत.
टिळकनगर पोलिस ठाण्यात कार्यरत असलेले विकास मुंडे हे घाटकोपरच्या छेडानगर जंक्शन येथे कर्तव्यास होते. त्यावेळी पूर्व द्रुतगती मार्गावर रस्त्याच्या मधोमध उभी असल्याचे त्यांनी पाहून मुंडे हे कारच्या दिशेने गेले. त्यावेळी कारमध्ये तीन तरुण दारूच्या नशेत झोपले असल्याचे त्यांनी पाहिले. विकास मुंडे यांनी तिथे जाऊन या तरुणांना उठवले आणि गाडी बाजूस घेण्यास सांगितले. त्यावरून तिघेही तरुण मुंडे यांच्याशी अर्वाच्च भाषेत बोलू लागले. एवढ्यावरच न थांबता त्या तिघांनी मुंडे यांना धक्काबुक्की करण्यास सुरूवात केली. तिघेही पळण्याच्या तयारीत असल्याचे पाहून त्या तिघांनी तेथून काढता पाय घेण्याचा प्रयत्न केला. मात्र मुंडे यांनी त्यांना रोखले. हे तिघेही पळून जाऊ नयेत म्हणून मुंडे त्याच्या गाडीत बसले. त्यावेळी तिघांनी गाडी पोलिस ठाण्यास न घेता ठाण्याच्या दिशेने पळवण्यास सुरूवात केली.
मात्र घाटकोपर येथील माता रमाबाई नगर येथे पोलिसांच्या नाकाबंदी पाहून त्याच्यातील एका साथीदाराने गाडीतून उडी टाकून पळ काढला. नाकाबंदीत मुंडे यांची सुटका करत पोलिसांनी तिघांना ही ताब्यात घेतले. या प्रकरणी टिळकनगर पोलिसांनी कलम ३३२, ३५३,३६५, २८३ सह मोटर वाहन कायदा कलम १८५, १८८ अंतर्गत गुन्हा नोंदवून दोघांना अटक केली आहे.