आज सगळीकडे नवरात्रीची धूम आहे. देवीचे भक्तगण नऊ रंगांमध्ये न्हाऊन निघाले असताना एक मराठमोळी अभिनेत्री मात्र देवीच्या विविध रूपांमध्ये दर्शन देत आहे. त्यामुळं भक्तांना मात्र आपल्या आवडत्या देवीचं नव्या रूपात दर्शन घडत आहे.
अभिनेत्री तेजस्विनी पंडीतनं नेहमीच प्रवाहापेक्षा हटके भूमिका साकारत सर्वांचंच लक्ष वेधून घेतलं आहे. कधी खलनायिकेच्या, तर कधी नायिकेच्या भूमिकेत आपले कलागुण दाखवले आहेत. अभिनयाखेरीजही आपली आवड-निवड जोपासत तिनं फॅशन डिझायनिंगचं स्वप्नही साकार केलं आहे. नवरात्र सुरू झाल्यापासून तेजस्विनीची वेगवेगळी रूपं प्रेक्षकांना पहायला मिळत आहेत.
नवरात्र सुरू झाल्यानंतर तेजस्विनीनं महालक्ष्मीच्या अंबाबाईचं रूप धारण करत सर्वांनाच आश्चर्याचा धक्का दिला होता. त्यानंतर कामाख्या देवी आणि जरीमरी आईच्या रूपातही तेजस्विनी प्रगटली. मेकअप आणि गेटअपच्या माध्यमातून देवीची रूपं सादर करणारी तेजस्विनी आता महालक्ष्मीच्या लुकमध्ये प्रेक्षकांच्या भेटीला आली आहे.