पशुपक्ष्यांच्या विभिन्न प्रजातींचा निसर्ग आणि मानवाच्या जीवनावर प्रभाव पडत असतो. यामुळेच पशु-पक्ष्यांच्या दुर्मिळ प्रजातींच्या संवर्धनासाठी बॉम्बे नॅचरल हिस्ट्री सोसायटी (बीएनएचएस) मोलाचे कार्य करत आहे. आता मुख्यमंत्री देवेंद्र फडणवीस यांनी सोसायटीच्या डिजिटायझेशन प्रकल्पासाठी शासन सर्वतोपरी मदत करेल, अशी घोषणा केली आहे. तसेच ‘बीएनएचएस’च्या हॉर्निमन सर्कल येथील इमारतीचा भाडेपट्टा करार लवकरात लवकर वाढवण्यात येणार असल्याचेही त्यांनी सांगितलं.
‘बीएनएचएस’च्या हॉर्निमन सर्कल येथील कार्यालयास मुख्यमंत्री फडणवीस यांनी भेट दिली.
टॅक्सीडर्मीचीही केली पाहणी
पक्ष्यांच्या विविध प्रजातींच्या टॅक्सीडर्मीची पाहणी मुख्यमंत्र्यांनी यावेळी केली. क्युरेटर राहुल खोत यांनी दुर्मिळ प्रजातींची माहिती दिली. यावेळी पक्ष्यांच्या उत्पत्तीस्थानाची आणि स्थलांतराची माहिती इंडियन बर्ड मायग्रेशन ॲटलासचं मुख्यमंत्र्यांच्या हस्ते अनावरण करण्यात आले.
बीएनएचएस’चे कार्य मोलाचं
निर्सगातील पशुपक्ष्यांच्या प्रजाती वाचवण्यासाठी ‘बीएनएचएस’चे कार्य संपूर्ण मानव जातीसाठी अतिशय मोलाचं आहे. अनेकदा कळत-नकळतपणे मानवाकडून पक्ष्यांच्या उत्पत्तीस्थानाला धोका पोहचत असतो. त्यामुळे निसर्गात होणाऱ्या बदलाचे परिणाम मानवाच्या जीवनावर पडताना दिसते. निर्सगात आवश्यक असलेल्या पशुपक्ष्यांच्या वास्तव्याचे महत्त्व ‘बीएनएचएस’सारख्या संस्थांमुळे कळत असते, असे मत मुख्यमंत्र्यानी या भेटीदरम्यान व्यक्त केलं.
एमएमआरडीए, सिडकोही करणार मदत
विकास करताना अनेकदा निसर्गाला धक्का पोहोचत असतो. निसर्गाने जे काही दिले आहे, त्याचे संवर्धन करणे गरजेचे आहे. त्यामुळे निसर्गाला, पशु-पक्ष्यांच्या उत्पत्ती आणि वास्तव्य स्थानांना धोका न पोहचू देता शाश्वत विकास कामे करण्यासाठी ‘बीएनएचएस’ने वेळोवेळी राज्य शासनास मार्गदर्शन मदत करत आहे. पशुपक्ष्यांच्या दुर्मिळ प्रजातींच्या संवर्धानसाठी करत असलेले ‘बीएनएचएस’चे काम हे सेवाभावी आहे. त्यामुळे राज्य शासन तसेच शासनाच्या एमएमआरडीए, सिडको या सारख्या संस्था बीएनएचएसच्या कार्याला सर्वतोपरी मदत करतील, असेही मुख्यमंत्र्यांनी सांगितले.