राज्यातील (maharashtra) सर्व शासकीय रुग्णालयांमध्ये दाखल होणाऱ्या रुग्णांना आता त्यांच्या उपचारासाठी आवश्यक असलेली औषधे (medicine) आणि वैद्यकीय साहित्याचा समावेश असलेला 'मेडिसिन बॉक्स' (Medicine box) दिला जाईल, अशी घोषणा राज्य सरकारने केली आहे.
नवशक्तीने दिलेल्या वृत्तानुसार, शासकीय रुग्णालयांमध्ये औषधांचा तुटवडा आणि अनियमित पुरवठ्याबाबत वाढत्या तक्रारींच्या पार्श्वभूमीवर हा निर्णय घेण्यात आला आहे.
औषधांच्या तुटवड्यामुळे अनेक रुग्णांना विशेषतः आर्थिकदृष्ट्या दुर्बल घटकातील रुग्णांना बाहेरून महागडी औषधे खरेदी करावी लागत होती.
राज्याचे वैद्यकीय शिक्षण मंत्री हसन मुश्रीफ यांनी या प्रश्नाची गंभीर दखल घेत, रुग्णांना कोणताही त्रास होणार नाही याची खात्री करण्याचे निर्देश रुग्णालय प्रशासनाला दिले आहेत.
अधिकाऱ्यांनी सांगितले की, या नवीन उपक्रमांतर्गत रुग्णांना रुग्णालयात दाखल केल्यावर लगेचच ‘मेडिसिन बॉक्स’ दिला जाईल.
यामुळे रुग्णालयातील साठा कमी झाला तरीही रुग्णांना विनाखंड औषधे मिळणे शक्य होणार आहे. याआधी परिचारिकांमार्फत ठराविक वेळी रुग्णालयातील भांडारातून औषधे दिली जात असत.
मात्र, नवीन पद्धतीनुसार औषधे थेट रुग्णांकडेच राहतील, ज्यामुळे ती सहज उपलब्ध होतील आणि रुग्णालयातील अंतर्गत पुरवठा साखळीवरील अवलंबित्व कमी होईल.
या मेडिसिन बॉक्समध्ये केवळ लिहून दिलेली औषधेच नसतील, तर इंजेक्शन आणि आयव्ही सेट, हातमोजे, सिरिंज, कापूस आणि मलमपट्टीचे साहित्य आदी गोष्टींचाही समावेश असेल. यापूर्वी या वस्तू अनेकदा रुग्णांना बाहेरून आणायला सांगितल्या जात असत.
नवीन व्यवस्था लागू झाल्यानंतरही जर कोणत्याही रुग्णालय कर्मचाऱ्याने रुग्णांना बाहेरून औषधे खरेदी करण्यास सांगितले, तर त्यांच्यावर कडक कारवाई केली जाईल, असे प्रशासनाने स्पष्ट केले आहे.
या निर्णयामुळे रुग्णांना मोठा दिलासा मिळण्याची आणि राज्यातील शासकीय आरोग्य सुविधांच्या कामकाजात सुधारणा होण्याची अपेक्षा आहे.
हेही वाचा