आपले ओठ फुलांच्या पाकळ्यांप्रमाणे नाजूक असतात हे काही वेगळं सांगायला नको. त्यामुळेच थंडीत शरीरातील इतर अवयवांपैकी ओठांना जास्त त्रास होतो. थंडीत ओठ फाटत असल्याने त्वचेसारखीच ओठांची काळजी घेणंही तितकंच महत्त्वाचं आहे.
तुम्हाला ऐकून आश्चर्य वाटंल की, ओठ फाटण्याची समस्या फक्त थंडीतच नाही, तर वातावरणातील बदलामुळंही होते. त्याचप्रमाणे वाढतं वय आणि शरीरात ‘ब’ जीवनसत्त्वाची कमतरता या कारणांनीही ओठ फाटू शकतात.
यासाठी आहारात ‘ब’ जीवनसत्त्व असलेल्या पदार्थांचा समावेश केला पाहिजे. जसं की, फळे, भाज्या, मासे, अंडी, सुकामेवा, दूध हे पदार्थ आहारात असलेच पाहिजे.
ओठांवर सौंदर्यप्रसाधन वापरण्यापूर्वी काळजी घेणंही तितकंच महत्त्वाचं आहे. कारण, सौंदर्यप्रसाधनामधील रसायनांमुळे ओठांवरील नाजूक त्वचेला नुकसान पोहोचतं.
रात्री झोपताना लिपस्टिक स्वच्छ धुऊन त्यावर लीप बाम किंवा तूप लावावं.
लिपस्टिक लावण्यापूर्वी ओठांवर लीप बाम लावा.
त्याचप्रमाणे लिपस्टिक ओठांवर दिर्घकाळ टिकण्यासाठी ती काही वेळ फ्रिजमध्ये ठेवून लावा.