गेल्या काही महिन्यांत आगीच्या अनेक घटनांच्या पार्श्वभूमीवर महापालिकेनं सोसायटींना अग्निसुरक्षा नियमांचे पालन करण्याची मुदत ३० दिवसांपर्यंत केली आहे. यापूर्वी मुंबई अग्निशमन दलानं सोसायट्यांना त्यांची गैर-कार्यरत अग्निशमन यंत्रणा कार्यान्वित करण्यासाठी १२० दिवसांचा अवधी दिला होता.
आता, बृहन्मुंबई महानगरपालिकेनं (BMC) उंच इमारतींमध्ये अग्निसुरक्षेसाठी विशेष मोहीम हाती घेतली आहे. प्रत्येक प्रभागातील ४ ते ५ अधिकाऱ्यांचे पथक सोसायट्या आणि आस्थापनांमध्ये जाऊन त्यांची अग्निसुरक्षा यंत्रणा तपासणार आहे.
अग्निशमन अधिकाऱ्यांच्या म्हणण्यानुसार, अग्निशमन यंत्रणा कार्यान्वित नसल्याच्या बाबतीत सुधारात्मक उपाययोजना करणं बंधनकारक असेल. सोसायटींना महिनाभरात अहवाल सादर करावा लागेल. तथापि, असं करण्यात अयशस्वी ठरणाऱ्या सोसायटींवर कायदेशीर कारवाई होऊ शकते, त्यानंतर वीज आणि पाणीपुरवठा खंडित होऊ शकतो.
यानंतर, जवळपास ४० सोसायट्यांना त्यांची यंत्रणा एका महिन्यात दुरुस्त करण्यासाठी नोटिस बजावण्यात आल्या आहेत, असं अहवालात म्हटलं आहे.
२२ ऑक्टोबर रोजी करी रोड येथील वन अवघना पार्क सोसायटीत आगीच्या दुर्घटनेनंतर ही कारवाई करण्यात आली आहे.
अहवालानुसार, मागील तपासणीत अग्निशमन यंत्रणा नसलेल्या ३२७ सोसायट्यांना नोटीस बजावण्यात आल्या होत्या. अग्निशमन पथकांनी वेगवेगळ्या निवासी सोसायटी, व्यावसायिक ठिकाणं आणि इतर आस्थापनांना भेटी दिल्या होत्या.
याव्यतिरिक्त, अग्निशमन दलानं १,५१७ रुग्णालये आणि नर्सिंग होमचे ऑडिट देखील केले. त्यापैकी २४७ खाजगी रुग्णालये/शुश्रुषा गृहे आणि सहा महानगरपालिका रुग्णालयांना नोटीस बजावण्यात आल्या ज्यांच्याकडे अग्निशमन यंत्रणा नाही. तथापि, यापैकी २३५ ठिकाणांनी आदेशांचे पालन केले आहे आणि आता अग्निशमन उपकरणांनी सुसज्ज आहेत.
हेही वाचा