म्हाडा लाॅटरी: अवघ्या साडेतीन तासांत १८०० हून अधिक इच्छुकांची नोंदणी

म्हाडाच्या मुंबई मंडळाच्या १३८४ घरांसाठी १६ डिसेंबरला लाॅटरी फुटणार असून या लाॅटरीसाठी अखेर सोमवारी जाहिरात प्रसिद्ध झाली आहे. तर दुपारी दोन वाजल्यापासून नोंदणीसह अर्ज विक्रीला अर्थात अर्ज भरण्यासही सुरूवात झाली आहे. नोंदणी आणि अर्जविक्रीस इच्छुकांकडून चांगला प्रतिसाद मिळत अाहे.

 अवघ्या साडेतीन तासात १८०० हून अधिक इच्छुकांनी नोंदणी केली आहे. तर अर्ज भरण्यासही सुरूवात झाली असून ४९८ हून अधिक जणांनी अर्ज भरले आहेत. महत्त्वाचं म्हणजे ५७ जणांनी आॅनलाईन पेमेंटचा पर्याय स्वीकारत अर्ज सादर केले आहेत. यावरूनच मुंबई मंडळाच्या लाॅटरीची इच्छुकांना किती प्रतिक्षा होती हेच दिसून येत आहे.

१० डिसेंबरपर्यंत मुदत

मुंबईच्या मंडळाच्या १३८४ घरांसाठी ५ नोव्हेंबरच्या दुपारी २ वाजल्यापासून नोंदणी, अर्ज विक्री आणि अर्ज स्वीकृती सुरूवात झाली आहे. तर १० डिसेंबरला रात्री ११.५९ मिनिटांपर्यंत नोंदणी, अर्जविक्री आणि अर्जस्वीकृती सुरू राहणार आहे. त्यानुसार सोमवारी दुपारी २ वाजता नोंदणी, अर्ज विक्री आणि अर्ज स्वीकृतीला सुरूवात झाली आहे. मुंबईत घरांना नेहमीच चांगला प्रतिसाद मिळतो.  त्यामुळे या घरांनाही चांगला प्रतिसाद मिळण्याची शक्यता आहे. तेव्हा इच्छुकांनी १० डिसेंबरच्या आत नोंदणी, अर्ज विक्री-अर्जस्वीकृती करत हक्काच्या घराचे स्वप्न पूर्ण करावं असं आवाहन मुंबई मंडळाकडून करण्यात आलं आहे.

वेबसाइट डाऊन

अाजपासून दिवाळी सुरू झाली अाहे. त्यामुळे दिवाळीच्या शुभमुहूर्तावर अर्ज भरण्यास लोकांनी प्राधान्य दिलं अाहे. हजारोंच्या संख्येने इच्छुकांनी अर्ज भरण्यासाठी म्हाडाच्या वेबसाइटला भेट दिल्याने वेबसाइट काही वेळातच डाऊन झाली. त्यामुळे इच्छुकांना प्रतिक्षा करावी. वेबसाइटची तांत्रिक अडचण तात्काळ दूर केली जात असून इच्छुकांना अर्ज भरण्यास अडथळा येणार नाही, असं मुंबई मंडळाच्या पणन अधिकाऱ्याने सांगितलं.