गोरेगाव-मुलुंड लिंक रोड (GMLR) प्रकल्पाच्या फेज 3-बी अंतर्गत उभारल्या जाणाऱ्या दुहेरी बोगद्यांसाठी टनेल बोरिंग मशीन (TBM) चे भाग जोडण्याचे काम दादासाहेब फाळके चित्रनगरी येथे वेगाने सुरू आहे.
शाफ्ट परिसरात TBM असेंब्लीचे काम सुरू असून, भूमिगत बोगदा खोदकामाच्या तयारीला गती देण्यात आली आहे. अतिरिक्त महापालिका आयुक्त (प्रकल्प) अभिजीत बांगर (Abhijit Bangar) यांनी अचानक पाहणी करत कामाच्या प्रगतीचा आढावा घेतला.
अधिकाऱ्यांच्या माहितीनुसार, पहिल्या TBM चे असेंब्ली काम जूनच्या दुसऱ्या आठवड्यापर्यंत पूर्ण होण्याची अपेक्षा आहे. दुसऱ्या TBM चे कामही समांतरपणे वेगाने सुरू आहे.
पहिले मशीन पूर्णपणे बसवल्यानंतर त्याची Site Acceptance Test (SAT) घेतली जाणार आहे. या चाचणीत मशीनच्या यांत्रिक, विद्युत, हायड्रॉलिक, कंट्रोल आणि सुरक्षा प्रणालींची तपासणी केली जाईल. सर्व चाचण्या यशस्वीरीत्या पूर्ण झाल्यानंतरच प्रत्यक्ष बोगदा खोदकाम सुरू होणार आहे.
या प्रकल्पांतर्गत दादासाहेब फालके चित्रनगरी (Dadasaheb Phalke Chitranagari) ते मुलुंडमधील खिंडीपाडा दरम्यान दुहेरी भूमिगत बोगदे बांधले जाणार आहेत. प्रत्येक बोगद्याची लांबी 4.70 किमी असून व्यास 14.20 मीटर असेल. तर संजय गांधी नॅशनल पार्क (Sanjay Gandhi National Park) परिसरातून जाणाऱ्या भागात बोगद्याचा व्यास 13 मीटर ठेवण्यात येणार आहे.
अधिकाऱ्यांनी ऑक्टोबर 2028 पर्यंत बोगदा खोदकाम पूर्ण करण्याचे लक्ष्य ठेवले असून, संपूर्ण प्रकल्प डिसेंबर 2028 पर्यंत पूर्ण करण्याचा मानस आहे.
मुंबईतील पूर्व-पश्चिम कनेक्टिव्हिटी सुधारण्यासाठी महत्त्वाच्या मानल्या जाणाऱ्या या प्रकल्पाचे काम वेळेत पूर्ण करण्यासाठी प्रशासनाकडून प्रयत्न सुरू असल्याचे महापालिकेने म्हटले आहे.
हेही वाचा