गुरूवारी दुपारी वित्तीय तुटीची आकडेवारी जाहीर होताच मुंबई शेअर बाजाराचा निर्देशांक सेन्सेक्स तब्बल ४५३ अंकांनी आपटून ३३,१४९ वर बंद झाला. तर राष्ट्रीय शेअर बाजाराचा निर्देशांक निफ्टी ३५ अंकांनी घसरून १०,२२७ वर अाला. यामुळे गुंतवणूकदारांचे १ लाख कोटी रुपये बुडाले.
चालू आर्थिक वर्षाच्या पहिल्या ७ महिन्यांमध्ये वित्तीय तुटीचा आकडा ९६ टक्क्यांपर्यंत पोहोचल्याने शेअर्समध्ये विक्रीचा कल पाहायला मिळाला. बँक, आॅटो, फायनांन्स सर्व्हिस, आयटी, मेटल, फार्मा कंपन्यांच्या शेअर्समध्ये जोरदार विक्री झाली. एकट्या खासगी आणि सरकारी बँकेचा निफ्टी ५४९ अंकांनी घसरून २५,२४६.८५ वर आला. यामुळे सेन्सेक्सला मोठा फटका बसला.
परिणामी गुंतवणूकदारांचे १ लाख कोटी रुपये बुडाले. बुधवारी बीएसईवर नोंदणीकृत एकूण कंपन्यांची मार्केट कॅप १,४७,०४,५८७.५४ कोटी रुपये होती. त्यात गुरूवारी दिवसअखेर १,०७,९३१.५४ कोटी रुपयांची घट होऊन मार्केट कॅप १, ४५, ९६,६५६ कोटी रुपयांवर आली.