मुंबई-पुणे, मुंबई-नाशिकदरम्यान रोज प्रवास करणाऱ्या प्रवाशांसाठी एक दिलासादायक बातमी आहे. या मार्गावर एक्सप्रेसनं प्रवास करणाऱ्या प्रवाशांना आता एक्स्प्रेसचा मासिक पास मिळणार आहे. त्यामुळं दररोज तात्काळत तिकीटासाठी लाईन लावायची गरज भासणार नाही.
मंगळवारपासून मासिक पास विकत घेता येणार आहे. पंचवटी, डेक्कन, इंटरसिटी, डेक्कन क्वीन यांसह एकूण १२ रेल्वे गाड्यांसाठी कोरोना पूर्व काळाप्रमाणे प्रवास सुविधा सुरू करण्याचा निर्णय रेल्वे प्रशासनाने घेतला होता. या निर्णयाची अंमलबजावणी मंगळवार २२ मार्च २०२२पासून होणार आहे. त्यामुळं प्रवाशांना मोठा दिलासा मिळणार आहे.
सीएसएमटी-मनमाड-सीएसएमटी पंचवटी, सीएसएमटी-पुणे-सीएसएमटी इंटरसिटी, सीएसएमटी-पुणे-सीएसएमटी इंद्रायणी, सीएसएमटी-पुणे-सीएसएमटी डेक्कन, सीएसएमटी-पुणे-सीएसएमटी सिंहगड आणि सीएसएमटी-पुणे-सीएसएमटी डेक्कन क्वीन या एक्स्प्रेसमध्ये विनाआरक्षित डबे आणि मासिक पास धारकांसाठी विशेष डबे राखीव असणार आहेत. या डब्यांमधून प्रवास करण्यासाठी साधे तिकीटही रेल्वे खिडक्यांवर उपलब्ध होईल, अशी माहिती मध्य रेल्वेने दिली.
रेल्वे गाड्यांतून प्रवास करताना करोना प्रसार रोखण्यासाठी राज्य सरकारने २७ नोव्हेंबर २०११ रोजी काढलेल्या मार्गदर्शक सूचनांचे काटेकोर पालन करणे आवश्यक आहे. या सूचनांनुसार विनाआरक्षित डब्यांमधून प्रवास करण्यासाठी युनिव्हर्सल ओळखपत्र किंवा संपूर्ण लसीकरण प्रमाणपत्र प्रवाशांना जवळ बाळगणे अनिवार्य आहे, अशी सूचनाही मध्य रेल्वेने दिली.