मुंबई (mumbai) उच्च न्यायालयाच्या निर्देशानुसार, बृहन्मुंबई महानगरपालिकेने (bmc) मुंबईतील नोंदणीकृत पथविक्रेत्यांना QR कोड-आधारित (QR code) ओळखपत्रे (ID cards) देण्यास सुरुवात केली आहे.
या वाटप प्रक्रियेला 1 जून 2026 रोजी सुरुवात झाली आहे. ही प्रक्रिया 26 प्रशासकीय विभाग कार्यालयांमार्फत राबवली जात आहे.
पदभार स्वीकारल्यानंतर लगेचच, मुंबईच्या महापौर रितू तावडे यांनी शहरातील बेकायदेशीर बांगलादेशी फेरीवाल्यांना हटवण्याची मोहीम जाहीर केली होती.
या पार्श्वभूमीवर, नोंदणीकृत विक्रेत्यांसाठीचा (street vendors) बहुप्रतिक्षित QR कोड ओळखपत्र उपक्रम अखेर सुरू करण्यात आला आहे.
मुंबईतील एकूण 99,435 नोंदणीकृत पथविक्रेत्यांपैकी आतापर्यंत सुमारे 20,000 विक्रेत्यांची (hawkers) पडताळणी पूर्ण झाली आहे.
उर्वरित नोंदणीकृत विक्रेत्यांनी आपापल्या विभाग कार्यालयात जाऊन 26 जून 2026 पर्यंत पडताळणी प्रक्रिया पूर्ण करावी, असे आवाहन महानगरपालिका प्रशासनाने केले आहे.
मुदत संपल्यानंतर कोणतीही पडताळणी किंवा QR कोड ओळखपत्रांचे वाटप केले जाणार नाही, असे स्पष्टीकरण बृहन्मुंबई महानगरपालिकेने दिले आहे.
नोंदणीकृत पथविक्रेत्यांची यादी सर्व 26 विभाग कार्यालयांमध्ये प्रदर्शित करण्यात आली आहे. तसेच, या याद्यांच्या प्रती स्थानिक लोकप्रतिनिधी, विक्रेत्यांच्या संघटना आणि पथविक्रेत्यांच्या निवडून आलेल्या प्रतिनिधींनाही देण्यात आल्या आहेत.
अर्जामध्ये दिलेल्या दूरध्वनी क्रमांकांवरून नोंदणीकृत विक्रेत्यांशी संपर्क साधला जात आहे आणि त्यांना पडताळणीसाठी व QR कोड-आधारित ओळखपत्रे घेण्यासाठी प्रत्यक्ष उपस्थित राहण्याच्या सूचना दिल्या जात आहेत.
विभाग कार्यालयात येताना विक्रेत्यांनी अर्जाची पोचपावती, मूळ आधार कार्ड आणि पासपोर्ट आकाराचे दोन फोटो सोबत आणावेत, असे सांगण्यात आले आहे.
निर्धारित कालावधीत पडताळणी प्रक्रिया पूर्ण न करणाऱ्या विक्रेत्यांना नंतर QR कोड-आधारित ओळखपत्रे मिळणे शक्य होणार नाही, असे महानगरपालिका प्रशासनाने पुन्हा एकदा स्पष्ट केले आहे.
हेही वाचा