मुंबईतील खार परिसरात झाड कोसळून गंभीर जखमी झालेल्या 14 वर्षीय मुलीचा उपचारादरम्यान मृत्यू झाला आहे. लिंकिंग रोड Linking Road जवळील एका बांधकाम सुरू असलेल्या इमारतीच्या परिसरातील झाड अचानक कोसळून तेथून जात असलेल्या ऑटोरिक्षावर पडल्याने हा अपघात घडला होता.
या दुर्घटनेत मुलीच्या डोक्याला आणि पाठीच्या कण्याला गंभीर दुखापत झाली होती. गेल्या आठवड्याभरापासून तिच्यावर खासगी रुग्णालयात उपचार सुरू होते. मात्र उपचारादरम्यान तिचा मृत्यू झाला. अपघातात जखमी झालेला आणखी एक प्रवासी अद्याप उपचार घेत असून काही जण किरकोळ जखमी झाले होते.
मुलीच्या मृत्यूनंतर पोलिसांनी बांधकामस्थळाशी संबंधित व्यक्तींवर अधिक गंभीर कलमे लावली आहेत. झाड कोसळण्यामागे निष्काळजीपणा आणि असुरक्षित बांधकाम परिस्थिती कारणीभूत होती का, याचा तपास सुरू आहे.
महापालिकेच्या प्राथमिक तपासात बांधकामाच्या कामामुळे झाडाचा पाया कमकुवत झाल्याची शक्यता व्यक्त करण्यात आली आहे. या घटनेमुळे मुंबईतील बांधकामस्थळांची सुरक्षितता आणि रस्त्यालगतच्या झाडांच्या देखभालीबाबत पुन्हा प्रश्नचिन्ह निर्माण झाले आहे.
हेही वाचा