FDAच्या कारवाईच्या यादीत वांद्रे पश्चिम येथील Otters Club, दहिसर पूर्वेतील Daily Fresh Bakers & Cakes, खार पश्चिमेतील Prince of Wales Restaurant, विलेपार्ले पूर्वेतील Raj Oil Trading, मरोळमधील Cafe Sifarish आणि चेंबूरमधील Zeptoची सुविधा यांचा समावेश आहे.
12 ऑगस्ट रोजी FDAने चेंबूरमधील Zeptoच्या सुविधेची तपासणी केली. यावेळी चिल्ड नॉन-व्हेजिटेरियन फूड सेक्शनचे तापमान 9 अंश सेल्सिअस आढळले. नियमानुसार हे तापमान 5 अंश किंवा त्यापेक्षा कमी असणे आवश्यक आहे.
तर फ्रोझन फूड सेक्शनचे तापमान मायनस 11 अंश सेल्सिअस आढळले. नियमानुसार फ्रोझन पदार्थांसाठी मायनस 18 अंश किंवा त्यापेक्षा कमी तापमान आवश्यक आहे.
तपासणीत अपुरे व्हेंटिलेशन आणि प्रकाश व्यवस्था, खराब झालेले पृष्ठभाग, तेल सांडलेले असणे, एक्झॉस्ट फॅनवर धूळ, कीटक नियंत्रणातील त्रुटी तसेच अस्वच्छता आणि कचऱ्याची अयोग्य विल्हेवाट यांसारख्या त्रुटीही आढळल्या.
FDAने सुधारणा करण्याची नोटीस दिली होती. मात्र निर्धारित वेळेत अनुपालन अहवाल सादर न केल्याने Zeptoचा खाद्य परवाना निलंबित करण्यात आला.
17 ऑगस्ट रोजी वांद्रे पश्चिम येथील Otters Clubची तपासणी करण्यात आली. यावेळी ‘Regular Paneer’ या नावाने विकला जाणारा पदार्थ अनालॉग पनीर असल्याचे आढळल्याचा FDAचा दावा आहे.
महाराष्ट्रात अनालॉग पनीर आणि तत्सम उत्पादनांचा वापर, साठवणूक आणि विक्री करण्यास मनाई आहे.
याशिवाय क्लबमध्ये अस्वच्छ फरशी, खराब झालेल्या टाइल्स, अंशतः ब्लॉक झालेला ड्रेन आणि रेफ्रिजरेटरच्या खराब गॅस्केटमुळे तापमान नियंत्रणात अडचणी असल्याचेही आढळले. त्यानंतर 18 ऑगस्ट रोजी क्लबचा FSSAI परवाना निलंबित करण्यात आला.
Daily Fresh Bakers & Cakes या दहिसर पूर्वेतील बेकरीमध्ये FDAला केक तयार करण्यासाठी टाइल्सच्या पृष्ठभागाचा वापर होत असल्याचे आढळले. तसेच झुरळे, माशा आणि मुंग्या आढळल्याचे अधिकाऱ्यांनी सांगितले.
याशिवाय कालबाह्य झालेला फूड कलर वापरला जात असल्याचेही समोर आले. या आस्थापनाकडे किरकोळ विक्रीची नोंदणी असताना उत्पादनाचे काम सुरू असल्याचे FDAने नमूद केले.
अन्न आणि पाण्याच्या चाचणीचे अहवाल तसेच FoSTaC प्रशिक्षण प्रमाणपत्र यांसारखी आवश्यक कागदपत्रेही उपलब्ध नसल्याचे आढळले.
Prince of Wales Restaurant, खार पश्चिम येथे तापमान नियंत्रण, खाद्यपदार्थांची साठवणूक, कीटक प्रतिबंध, उपकरणांची स्वच्छता आणि कचरा व्यवस्थापनातील त्रुटी आढळल्यानंतर त्याचे नोंदणी प्रमाणपत्र निलंबित करण्यात आले.
Raj Oil Trading, विलेपार्ले पूर्व येथे तेलाची अयोग्य साठवणूक, स्वच्छतेचा अभाव आणि तापमान व आर्द्रता नियंत्रणातील त्रुटी आढळल्या. काही तेलाच्या पॅकेट्सवर उंदरांनी कुरतडल्याच्या खुणा आणि साठवणूक परिसरात दुर्गंधी आढळल्याचे FDAने सांगितले. त्यामुळे खाद्य परवाना निलंबित करण्यात आला.
तर Cafe Sifarish, मरोळ येथे तापमान नियंत्रण, खाद्यपदार्थांची साठवणूक, कीटक प्रतिबंध, उपकरणांची स्वच्छता आणि कर्मचाऱ्यांसाठी वैयक्तिक स्वच्छतेच्या सुविधांमध्ये त्रुटी आढळल्याने परवाना निलंबित करण्यात आला.
FDAने 14 जुलै ते 17 ऑगस्टदरम्यान महाराष्ट्रभर खाद्यपदार्थांच्या आस्थापनांवर तपासणी मोहीम राबवली. या मोहिमेत 65 हॉटेल्स, रेस्टॉरंट्स, ढाबे आणि इतर खाद्य आस्थापनांची तपासणी करण्यात आली.
यापैकी 50 आस्थापनांना सुधारणा नोटीस देण्यात आली, तर 8 आस्थापनांचे परवाने किंवा नोंदणी निलंबित करण्यात आली.
याशिवाय गुटखा आणि पान मसाल्यासारख्या प्रतिबंधित पदार्थांच्या विक्री, वितरण आणि वाहतुकीप्रकरणी 7 FIR दाखल करण्यात आल्या असून 10 जणांना अटक करण्यात आली. सुमारे 99.39 लाख रुपयांचा प्रतिबंधित साठा जप्त करण्यात आला.
17 ऑगस्ट रोजी पालघरमधील मुंबई-अहमदाबाद महामार्गावरील चारोटी टोलनाक्यावर FDAने सुमारे 2 लाख 54 हजार 640 युनिट कोलोस्ट्रम जप्त केले. या साठ्याची किंमत सुमारे 2.12 लाख रुपये असल्याचे सांगण्यात आले.
योग्य लेबलिंगशिवाय आणि अस्वच्छ परिस्थितीत हा साठा वाहतूक केला जात असल्याचे FDAने सांगितले. तापमान नियंत्रणाचीही योग्य व्यवस्था नसल्याचे आढळले. त्यानंतर संपूर्ण साठा नष्ट करण्यात आला.
FDAने स्पष्ट केले आहे की, राज्यभरात अशा तपासण्या सुरूच राहणार असून अन्नपदार्थांची गुणवत्ता, स्वच्छता, साठवणूक आणि तापमान नियंत्रणाच्या नियमांचे पालन न करणाऱ्या आस्थापनांवर कठोर कारवाई केली जाईल.
नागरिकांना अन्न भेसळ किंवा अन्नाच्या गुणवत्तेबाबत तक्रार असल्यास Food Safety Connect App, FoSCoS पोर्टल, FDA तक्रार पोर्टल किंवा 1800222365 या टोल-फ्री क्रमांकावर तक्रार करण्याचे आवाहन करण्यात आले आहे.
हेही वाचा