कोंकणातील अवकाळी पावसाचा फटका यंदा हापूस आंबा उत्पादनाला बसला असून त्याचा थेट परिणाम मुंबईच्या बाजारात दिसत आहे. उत्पादनात मोठी घट झाल्याने पुरवठा कमी झाला आहे. तर दुसरीकडे मागणी कायम असल्याने दर वाढले आहेत.
व्यापाऱ्यांच्या माहितीनुसार, यंदा हापूसचे उत्पादन सरासरीच्या तुलनेत सुमारे 25 टक्क्यांवर आले आहे. हवामानातील बदलांमुळे हंगामही यंदा नेहमीपेक्षा लवकर संपण्याची शक्यता आहे.
नवी मुंबईतील APMC मार्केटमध्ये आंब्याची आवक लक्षणीयरीत्या घटली आहे. साधारणपणे या काळात एक लाख पेट्या बाजारात येतात, मात्र सध्या केवळ 40 हजार पेट्यांचीच आवक होत आहे. पुढील काही दिवसांत थोडी वाढ अपेक्षित आहे.
पुरवठा कमी असतानाही मुंबईत हापूसची मागणी कायम आहे. त्यामुळे दर वाढले असून, गुणवत्तेनुसार एका पेटीची किंमत 2,000 ते 6,000 रुपयांदरम्यान आहे. उच्च प्रतीच्या हापूसला यापेक्षाही अधिक दर मिळत आहेत.
पुरवठ्यातील तुटवडा भरून काढण्यासाठी दक्षिण भारतातील आंबे बाजारात येत आहेत. मात्र, अस्सल कोकणातील हापूसची उपलब्धता मर्यादित असून त्याची मागणी कायम उच्चच आहे.
दरम्यान, निर्यातीतही अडचणी निर्माण झाल्या आहेत. गल्फ देशांमध्ये पाठवणीवर परिणाम झाला असून, युरोप आणि अमेरिकेत निर्यातीसाठी हवाई वाहतुकीचा खर्च वाढल्याने व्यापाऱ्यांना फटका बसत आहे.
तज्ज्ञांच्या मते, कमी उत्पादन आणि कायम असलेली मागणी यामुळे यंदाचा आंबा हंगाम लहान आणि ग्राहकांसाठी महाग ठरणार आहे.
हेही वाचा