जेष्ठ अभिनेते डॉ. श्रीराम लागू यांच्या पार्थिवावर शुक्रवारी अंत्यसंस्कार करण्यात येणार आहेत. लागू यांचे चिरंजीव आनंद अमेरिकेत आहेत. ते आल्यानंतर गुरुवारी अंत्यसंस्कार केले जातील, असे लागू कुटुंबीयांच्यावतीने सांगण्यात आलं होतं. मात्र, आनंद गुरुवारपर्यंत पुण्यात पोहचू शकत नसल्याने लागू यांच्या पार्थिवावर शुक्रवारी सकाळी अंत्यसंस्कार करण्यात येतील, असं लागू यांच्या पत्नी दीपा श्रीराम आणि कन्या डॉ. शुभांगी कानिटकर यांनी बुधवारी स्पष्ट केलं.
डॉ. श्रीराम लागू यांचे मंगळवारी ९२ व्या वर्षी हृदयविकाराच्या धक्क्याने निधन झाले. त्यांचं पार्थिव दीनानाथ मंगेशकर रुग्णालयात ठेवण्यात आलं आहे. त्यांच्या पार्थिवावर शासकीय इतमामात अंत्यसंस्कार करण्याचे आदेश राज्य सरकारच्या सामान्य प्रशासन विभागाने काढले आहेत. उपसचिव उमेश मदन यांनी पुण्याचे जिल्हाधिकारी नवल किशोर राम आणि पोलिस आयुक्त के. व्यंकटेशम यांना पत्राद्वारे तशी सूचना केली आहे.
लागू यांचं पार्थिव अंत्यदर्शनासाठी बालगंधर्व रंगमंदिर येथे शुक्रवारी सकाळी १० ते ११ या वेळेत ठेवले जाणार आहे. लागू निरीश्वरवादी होते. त्यामुळे धार्मिक विधी होणार नाहीत, असे लागू यांच्या निकटवर्तीयांनी सांगितलं.
हेही वाचा -
'नटसम्राट' श्रीराम लागू काळाच्या पडद्याआड