'सत्य हे कायम सत्यच राहतं', असं म्हणत बाॅलिवूड अभिनेत्री तनुश्री दत्ताने केलेल्या लैंगिक शोषणाच्या आरोपांवर अखेर ज्येष्ठ अभिनेते नाना पाटेकर यांनी सोमवारी दुपारी मौन सोडलं. मुंबईत पत्रकार परिषद घेऊन नानाने आपली बाजू मांडण्याचा प्रयत्न केला असला, तरी पत्रकारांनी विचारलेल्या प्रश्नांना उत्तर द्यायचं मात्र त्यांनी टाळलं. एवढंच नव्हे, तर अवघ्या एका मिनिटांत त्यांनी आपली पत्रकार परिषद आटोपली.
आपल्यावर अन्याय झाल्याबाबत जवळजवळ १० वर्षांनी जाग आलेल्या तनुश्रीने नानांवर गैरवर्तन केल्याचे आरोप केले होते. २००८ मध्ये दिग्दर्शक राकेश सारंग यांच्या ‘हाॅर्न ओके प्लिज’ या हिंदी सिनेमाच्या चित्रीकरणादरम्यान नानांनी खूप त्रास दिला आणि गाण्यात त्यांनी इंटिमेट सीनचाही आग्रह धरल्याचं तनुश्रीचं म्हणणं आहे.
यावर नानांनी कोणतीही शाब्दिक प्रतिक्रिया न देता वकील राजेंद्र शिरोडकर यांच्या मार्फत तनुश्रीला कायदेशीर नोटीस पाठवली आणि लवकरच पत्रकार परिषदेतून बाजू मांडणार असल्याचं सांगितलं होतं. तर दुसऱ्या बाजूला तनुश्रीनेही ओशिवरा पोलिस ठाण्यात नाना पाटेकर, राकेश सारंग आणि कोरिओग्राफर गणेश आचार्य यांच्याविरोधात तक्रार नोंदवली आहे.
हेही वाचा-
वाचाळ बडबड! नाना पाटेकरांची तनुश्रीला नोटीस
#Metoo: नाना पाटेकरनंतर कैलाश खेर, विकास बहल यांच्यावर लैंगिक शोषणाचे आरोप