यंदाच्या गणेशोत्सवावर पावसाचं सावट असल्याची भीती व्यक्त केली जात आहे. सोमवार सकाळपासून मुंबईत मुसळधार पावसाला (Mumbai Rain) सुरुवात झाली आहे. उपनगरात पावसाचा फार जोर नसला तरी मुंबईत मात्र सकाळची सुरुवात धो धो पावसाने झाली.
किनारपट्टीजवळ जोरदार वारे वाहण्याची शक्यता आहे. हवामान खात्याने असा अंदाज वर्तवला आहे की सोमवारी पावसाची तीव्रता बहुतेक हलक्या ते मध्यम स्वरूपाची राहील, परंतु कधीकधी जोरदार सरी बरसण्याची शक्यता नाकारता येत नाही.
26 ऑगस्टपासून पावसाचा जोर वाढेल, असा अंदाज हवामान विभागाने वर्तवला आहे. त्यामुळे नागरिकांनी आणि प्रशासनानेही विशेष काळजी घेण्याची गरज आहे. विशेषतः कोकण आणि मध्य महाराष्ट्रातील घाट क्षेत्रांमध्ये 26 ते 28 ऑगस्टदरम्यान अतिवृष्टीची शक्यता वर्तवण्यात आली आहे. हवामान विभागाने या भागांसाठी 'यलो अलर्ट' जारी केला आहे.
गेल्या आठवड्यात झालेल्या अतिवृष्टीमुळे राज्यातील अनेक भागांत पूरसदृश स्थिती निर्माण झाली होती, त्यामुळे जीवित आणि मालमत्तेचे मोठे नुकसान झाले. आता येणारा पाऊस त्यापेक्षा कमी तीव्रतेचा असला, तरी सध्याच्या संतृप्त जमिनीमुळे आणि नद्यांतील वाढलेल्या पाणीपातळीमुळे परिस्थिती गंभीर होण्याची शक्यता आहे.
रायगड आणि रत्नागिरीसाठी आयएमडीने यलो अलर्ट जारी केला आहे, कोकणातील काही भागात मुसळधार पावसाचा इशारा दिला आहे.
ठाणे आणि नवी मुंबईत सोमवारी हलक्या ते मध्यम स्वरूपाचा पाऊस पडण्याची शक्यता आहे. तर दुपारी किंवा संध्याकाळी अचानक मुसळधार पाऊस पडण्याची शक्यता आहे. या भागांमध्ये तापमान 26 ते 30 अंश सेल्सिअस दरम्यान राहण्याचा अंदाज आहे.
हेही वाचा