'या' रेल्वे स्थानकांवर होणार आरोग्य चाचणी

मुंबईत कोरोनाचा प्रादुर्भाव अधिक वाढत आहे. या वाढत्या रुग्णसंख्येला आळा घालण्यासाठी विविध स्थरावर प्रयत्न केले जात आहेत. अशातच लॉकडाऊनच्या काळात बंद असलेली वाहतूक सुविधा सुरु झाली आहे. प्रवाशांच्या संख्या कमी करुन रिक्षा, टॅक्सी, बेस्ट बस, एसटी व लोकलमध्ये प्रवासाची परवानगी देण्यात आली आहे. त्यामुळं या प्रवाशांसह इतर नागरिकांना त्याचा संसर्ग होऊ नये यासाठी मुंबईकरांच्या आरोग्याची काळजी घेण्यासाठी १२ रेल्वे स्थानकांवर आरोग्य चाचणी केंद्र सुरू करण्याचा निर्णय मध्य रेल्वेने घेतला आहे. 

कोरोनावर मात करण्यासाठी रेल्वे स्थानकावर हेल्थ एव्हीएम (स्वयंचलित वेडिंग मशीन) कार्यान्वित करण्यात येणार आहे. त्यावर मास्क, सॅनिटायझर आणि ग्लोव्ह्‌ज उपलब्ध होणार आहेत. छत्रपती शिवाजी महाराज टर्मिनस, दादर आणि लोकमान्य टिळक टर्मिनस स्थानकांवर एव्हीएम बसवण्यात येणार आहे. 

• प्रवाशाला नवीन मास्क, सॅनिटायझर आणि ग्लोव्ह्‌जची आवश्यकता असेल तर कोरोना प्रतिबंधात्मक स्वयंचलित वेंडिंग मशीन डिस्पेंसरमधून त्वरित मिळवता येतील. 

• नाममात्र किंमतीत ट्रिपल प्लाय मास्क, हँड सॅनिटायझर बाटली आणि ग्लोव्ह्‌ज देण्यात येतील. 

• हे एव्हीएम नवीन इनोव्हेटिव्ह नॉन-फेअर रेव्हेन्यू आयडिया स्कीम (एनआयएनएफआरआयएस) अंतर्गत विविध स्थानकांवर उघडली जातील. 

आरोग्य मंत्रालयाने रेल्वे प्रवाशांसाठी दिलेल्या मार्गदर्शक सूचनांनुसार, रेल्वेगाड्यांमधून प्रवासादरम्यान सर्व प्रवाशांना मास्कचा वापर करणे गरजेचे आहे.

प्रवाशांच्या आरोग्याच्या पॅरामीटर्सची त्वरित तपासणी करून घेण्यासाठी मुंबई विभागातर्फे कल्याण, ठाणे आणि लोकमान्य टिळक टर्मिनस इथं हेल्थ एटीएम कियोस्कचे काम सुरू आहे. छत्रपती शिवाजी महाराज टर्मिनस, वडाळा रोड, चेंबूर, पनवेल, दादर, कुर्ला, घाटकोपर, विक्रोळी, भांडुप, मुलुंड, डोंबिवली आणि बदलापूर इत्यादी १२ उपनगरी स्थानकांवर हेल्थ एटीएम बसविण्यासाठी ई-निविदा मागवल्या आहेत.