इगतपुरी ते आमणे या मुंबई ते नागपूर समृद्धी महामार्ग प्रकल्पाच्या शेवटच्या टप्प्याचे ९० टक्के काम पूर्ण झाले आहे. महाराष्ट्र राज्य रस्ते विकास महामंडळाने (MSRDC) उर्वरित काम वेगाने पूर्ण करून जुलै अखेरपर्यंत हा टप्पा वाहतूक सेवेत आणण्याचे नियोजन केले आहे.
जुलैमध्ये हा शेवटचा टप्पा वाहतुकीसाठी खुला झाल्यास मुंबई ते नागपूर थेट प्रवास आठ तासांत सहज शक्य होणार आहे. सध्या भरवीर ते इगतपुरी या महामार्गाच्या 25 टप्प्यांचे काम पूर्ण झाले असून 3 मार्चपासून हा टप्पा वाहतूक सेवेत दाखल होणार आहे.
MSRDC ने राज्याची राजधानी आणि उपराजधानीला जोडण्यासाठी 701 किमी लांबीचा समृद्धी महामार्ग प्रकल्प हाती घेतला आहे. या महामार्गाचा नागपूर ते भरवीर हा 600 किमीचा भाग सध्या वाहतूक सेवेत असून, भरवीर ते इगतपुरी हा 25 किमीचा रस्ता सोमवारपासून वाहतुकीसाठी खुला करण्यात येणार आहे.
सार्वजनिक बांधकाम (उपक्रम) मंत्री दादा भुसे यांच्या हस्ते या टप्प्याचे उद्घाटन होणार आहे. भारवीर ते आमणे या 75 किलोमीटरच्या पट्ट्यातील 90 टक्के काम आतापर्यंत पूर्ण झाल्याची माहिती व्यवस्थापकीय संचालक अनिलकुमार गायकवाड यांनी दिली.
इगतपुरी ते आमणे या टप्प्यातील एका मोठ्या पुलाचे काम आता प्रलंबित आहे. हे काम पूर्ण करून जुलैमध्ये हा टप्पा शंभर टक्के पूर्ण करण्याचे नियोजन आहे. काम पूर्ण झाल्यास हा टप्पा तातडीने राबविला जाईल, असेही गायकवाड यांनी सांगितले.
समृद्धी प्रकल्प पूर्ण झाल्यानंतर एमएसआरडीसी नागपूर ते गोवा शक्तीपीठ महामार्गाचे काम हाती घेणार आहे. शक्तीपीठ महामार्ग समृद्धीपेक्षा 100 किमी लांब आहे. हा महामार्ग 12 जिल्ह्यांना जोडणार आहे. तसेच नागपूर ते गोवा अंतर 10 ते 11 तासात पूर्ण करता येईल.
हेही वाचा