महाराष्ट्र राज्य रस्ते विकास महामंडळ (MSRDC) कडून विरार–अलिबाग मल्टीमोडल कॉरिडॉर या महत्त्वाकांक्षी प्रकल्पाचे काम वेगाने पुढे नेले जात आहे. मुंबई महानगर प्रदेशातील (MMR) कनेक्टिव्हिटी सुधारण्यासाठी हा महत्त्वाचा प्रकल्प मानला जात आहे.
हा प्रस्तावित 126 किमी लांबीचा अॅक्सेस-कंट्रोल्ड कॉरिडॉर पालघर जिल्ह्यातील विरार ते रायगड जिल्ह्यातील अलिबाग यांना जोडणार असून, ठाणे आणि नवी मुंबई मार्गे जाणार आहे. 8 ते 14 लेनचा हा रस्ता तयार केला जाणार आहे. मुंबईतील वाहतूक कोंडी कमी करण्यासाठी शहराबाहेरून जड वाहतूक वळवण्याचा उद्देश आहे.
‘लोकसत्ता’च्या वृत्तानुसार, या कॉरिडॉरचा पूर्ण वापर करणाऱ्या प्रवाशांना वाहनाच्या प्रकारानुसार सुमारे 765 ते ₹1,000 इतका टोल भरावा लागू शकतो. या प्रस्तावित टोल दरांकडे सध्या विशेष लक्ष वेधले जात आहे.
या प्रकल्पाचा अंदाजित खर्च 55,000 कोटींहून अधिक असून, त्यातील मोठा हिस्सा जमीन संपादनासाठी खर्च केला जाणार आहे. तसेच हा कॉरिडॉर जवाहरलाल नेहरू पोर्ट, नवी मुंबई आंतरराष्ट्रीय विमानतळ आणि मुंबई ट्रान्स हार्बर लिंक (अटल सेतू) यांसारख्या महत्त्वाच्या प्रकल्पांशी जोडला जाणार आहे.
मल्टीमोडल स्वरूपात विकसित होणाऱ्या या मार्गावर मेट्रो आणि बससारख्या सार्वजनिक वाहतूक सुविधांचाही समावेश असणार आहे. प्रकल्प पूर्ण झाल्यानंतर प्रवासाचा वेळ मोठ्या प्रमाणात कमी होईल आणि प्रादेशिक विकासालाही चालना मिळेल, अशी अपेक्षा आहे.
हा प्रकल्प टप्प्याटप्प्याने राबवला जाणार असून, 2030 पर्यंत पूर्ण करण्याचे उद्दिष्ट आहे. मात्र, जमीन संपादन आणि पुनर्वसनासंदर्भातील अडचणी अजूनही कायम आहेत.
हेही वाचा