कल्याण-डोंबिवली महानगरपालिकेच्या (KDMC) शास्त्रीनगर रुग्णालयात डॉक्टर आणि वैद्यकीय कर्मचाऱ्यांवर झालेल्या मारहाणीच्या घटनेवर खासदार डॉ. श्रीकांत शिंदे यांनी तीव्र प्रतिक्रिया व्यक्त केली आहे. या घटनेचा निषेध करत त्यांनी कायदा हातात घेणाऱ्या कोणालाही पाठीशी घातले जाणार नाही आणि दोषींवर कठोर कारवाई केली जाईल, असे स्पष्ट केले.
डॉ. श्रीकांत शिंदे म्हणाले की, एक लोकप्रतिनिधी आणि डॉक्टर या दोन्ही भूमिकांमधून ते कल्याण-डोंबिवली महानगरपालिकेतील सर्व डॉक्टर, परिचारिका आणि आरोग्य कर्मचाऱ्यांसोबत ठामपणे उभे आहेत.
रुग्णालयात सेवा देणाऱ्या सर्व आरोग्य कर्मचाऱ्यांची सुरक्षा आणि सन्मान ही सर्वोच्च प्राथमिकता असल्याचेही त्यांनी नमूद केले.
या प्रकरणी पोलिसांनी गुन्हा दाखल करून तीन आरोपींना अटक केली आहे. या घटनेत सहभागी असलेल्या कोणत्याही व्यक्तीला पक्षाकडून संरक्षण दिले जाणार नाही, असे डॉ. शिंदे यांनी स्पष्ट केले. दोषी व्यक्ती पक्षाचा कार्यकर्ता असल्याचे निष्पन्न झाल्यास त्याच्याविरोधात पक्षस्तरावरही कठोर शिस्तभंगाची कारवाई केली जाईल, असा इशाराही त्यांनी दिला.
ते पुढे म्हणाले की, डॉक्टर आणि आरोग्य कर्मचाऱ्यांची सेवा ही केवळ नोकरी नसून मानवसेवा आहे. अत्यंत तणावपूर्ण आणि कठीण परिस्थितीत ते दिवस-रात्र रुग्णांची सेवा करतात. त्यामुळे त्यांच्याविरोधात कोणत्याही प्रकारची हिंसा किंवा गैरवर्तन अजिबात सहन केले जाणार नाही.
यावेळी खासदार डॉ. श्रीकांत शिंदे यांनी नागरिकांनाही आवाहन केले. डॉक्टर, परिचारिका आणि इतर वैद्यकीय कर्मचाऱ्यांच्या सुरक्षेचा, सन्मानाचा आणि निर्भयपणे सेवा देण्याच्या त्यांच्या अधिकाराचा आदर करण्याचे आवाहन त्यांनी केले.
हेही वाचा