बेलापूर विधानसभा मतदारसंघातील 57 मतदारांचा पत्ता थेट बेलापूर महानगरपालिका वॉर्ड कार्यालयाचाच देण्यात आल्याचं उघड झालं आहे.
महानगरपालिका वॉर्ड कार्यालयाच्या पत्त्यावर नोंदवलेले हे 57 मतदार प्रत्यक्षात तिथे राहतच नाहीत, असा धक्कादायक निष्कर्ष महाराष्ट्र नवनिर्माण सेनेच्या (मनसे) तपासातून समोर आला आहे. मनसेच्या कार्यकर्त्यांनी केलेल्या प्रत्यक्ष पाहणीत वॉर्ड कार्यालयातील कर्मचाऱ्यांनी स्पष्ट सांगितले की, या यादीतील कोणताही व्यक्ती येथे राहत नाही.
“वॉर्ड कार्यालयात 57 मतदार कसे नोंदवले गेले? हे मतदार फाईल्स आणि टेबलांमध्ये राहतात का?” असा सवाल मनसेने उपस्थित केला. पक्षाने या नोंदींना “मतदार नोंदणीतील भयंकर निष्काळजीपणाचे उदाहरण” असे संबोधले आहे. अशा चुका निवडणूक यंत्रणेच्या विश्वासार्हतेवरच प्रश्नचिन्ह निर्माण करतात, असे म्हटले आहे.
“निवडणूक अधिकारी झोपेतच हे मतदार नोंदवत होते काय?” असा व्यंग्यात्मक सवालही मनसेने केला.
आपल्या वैशिष्ट्यपूर्ण पद्धतीत मनसेने जाहीर केले की, या गोंधळासाठी जबाबदार असलेल्या निवडणूक अधिकाऱ्यांचा लवकरच ‘सत्कार’ केला जाणार आहे. “मतदार यादीतील अशा अफलातून चुकांसाठी आम्ही त्यांना शाल आणि नारळ देऊन गौरवू,” असे वक्तव्यात म्हटले आहे.
तात्काळ चौकशीची मागणी
मनसेने या प्रकरणाची तात्काळ चौकशी करण्याची मागणी केली आहे. मतदानापूर्वी अशा नोंदी कशा झाल्या याचा तपास करून योग्य सुधारात्मक कारवाई करण्याचे आवाहन निवडणूक आयोगाला केले आहे.
हेही वाचा