लोकलमध्ये तरूणीची छेड काढणारा अटकेत

लोकल ट्रेनमध्ये महिलांशी गैरवर्तवणूक करणाऱ्या एका २७ वर्षीय विकृताला रेल्वे पोलिसांनी अटक केली आहे. परवेज फकरूद्दीन सिद्धीकी, असं या आरोपीचं नाव आहे. या प्रकरणी पोलिस अधिक तपास करत आहेत.

चुकीचा स्पर्श

ठाणे परिसरात राहणारी पीडित तरूणी ही तिच्या कुटुंबीयांसोबत बोरिवली येथील नॅशनल पार्क पाहण्यासाठी मंगळवारी गेली होती. त्यावेळी घरी परतण्यासाठी त्यांनी दादरहून रात्री ११ च्या सुमारास ठाण्याला जाणारी लोकल पकडली. लोकलमध्ये गर्दी असल्याने परवेजने पीडित तरूणीला चुकीचा स्पर्श करण्यास सुरूवात केली. हा प्रकार लक्षात आल्यावर पीडित तरूणी परवेजपासून दूर गेली.

भावाला मारहाण

तरीही परवेजने तिच्याजवळ जाऊन पीडितेला त्रास देण्यास सुरूवात केली. परवेजला हटकत पीडित मुलीने आपल्या भावाला ही बाब सांगितल्यानंतर भावाने त्याला जाब विचारला. मात्र परवेजने थेट पीडित तरूणीच्या भावाला मारहाण करण्यास सुरूवात केली. या दोघांनाही लोकलच्या डब्यातील नागरिकांनी कुर्ला स्थाकावर उतरवलं.

त्यानंतर तरूणीच्या कुंटुंबीयांनी कुर्ला स्थानकावरील पोलिसांची मदत घेतली. पोलिसांनी परवेजच्या मुसक्या आवळल्यानंतर परवेजने गुन्ह्यांची कबुली दिली. न्यायालयाने त्याला पोलिस कोठडी सुनावली आहे.