मुंबईतील पीपल्स एज्युकेशन सोसायटीच्या सिद्धार्थ वाणिज्य व अर्थशास्त्र महाविद्यालयास ग्रंथालय बांधकाम, ग्रंथालयातील सोयी सुविधा, वाणिज्य व विधी महाविद्यालयाची डागडुजी आणि महाड येथील सुभेदार संवादकर वसतिगृह बांधकाम यासाठी मिळून १२ कोटी ७९ लाख ७४ हजार रुपये निधी मंजूर करण्यात आल्याची माहिती राज्याचे सामाजिक न्याय व विशेष सहाय्य मंत्री धनंजय मुंडे यांनी दिली. पुढच्या आठवड्यात सिद्धार्थ महाविद्यालयाला भेट देऊन तेथील सोयी-सुविधांची स्वतः पाहणी करणार असल्याचंही धनंजय मुंडे यांनी सांगितलं. (siddharth college, mumbai will get funds for repairing work by maharashtra government)
सामाजिक न्याय व विशेष सहाय्य मंत्री धनंजय मुंडे यांच्या अध्यक्षतेखाली मंत्रालयात झालेल्या बैठकीत हा निर्णय घेण्यात आला. येत्या दोन दिवसात याबाबतचा शासन निर्णय जारी करण्यात येणार आहे. या बैठकीला सामाजिक न्याय विभागाचे सचिव पराग जैन, सहसचिव दिनेश डिंगळे, समाज कल्याण आयुक्त प्रवीण दराडे यांसह विभागाचे अधिकारी उपस्थित होते.
सिद्धार्थ महाविद्यालयातील ग्रंथालय बांधकाम, ग्रंथालयातील सोयीसुविधा, वाणिज्य व विधी महाविद्यालयाच्या डागडुजीची कामे अनेक वर्षांपासून प्रलंबित होती. ही कामे तातडीने मार्गी लावण्यासाठी निधी पुरवठ्यासाठी सातत्याने मागणी होत होती. त्यानुसार सामाजिक न्याय विभागाकडे प्राप्त झालेल्या प्रस्तावांपैकी मुंबई स्थित पीपल्स एज्युकेशन सोसायटीच्या सिद्धार्थ वाणिज्य व अर्थशास्त्र महाविद्यालयाच्या ग्रंथालय बांधकामासाठी ४ कोटी ९४ लाख ३६ हजार ७०० रुपये, पीपल्स एज्युकेशन सोसायटीच्या सिद्धार्थ वाणिज्य व अर्थशास्त्र महाविद्यालय व विधी महाविद्यालय या इमारतीच्या डागडुजीसाठी १ कोटी ९९ लाख ७१ हजार ८७२ रुपये, तसंच सिद्धार्थ महाविद्यालयाच्या ग्रंथालयामध्ये आधुनिक सोयी सुविधा उपलब्ध करून देण्यासाठी ४ कोटी ४९ लाख २५ हजार रुपये आणि पीपल्स एज्युकेशन सोसायटीच्या महाड जि. रायगड इथं सुभेदार संवादकर वसतिगृह बांधकामासाठी १ कोटी ३६ लाख ४० हजार ६०३ रुपये इतकी रक्कम प्रस्तावित करण्यात आली होती.
धनंजय मुंडे यांच्या अध्यक्षतेखाली पार पडलेल्या बैठकीत या प्रस्तावास मंजुरी देण्यात आली असून, या चार कामांसाठी मिळून १२ कोटी ७९ लाख ७४ हजार १७५ रुपये इतक्या निधीला मंजुरी देण्यात आली आहे. येत्या दोन दिवसात याबाबतचा शासन निर्णय जारी करण्यात येणार असल्याची माहिती धनंजय मुंडे यांनी दिली.
हेही वाचा - 'या' १०१ विषयांचा २५ टक्के अभ्यासक्रम कमी
ऑगस्टपासून महाविद्यालयांचे ऑनलाइन वर्ग सुरू होणार?