शिवसेना खासदार संजय राऊत यांनी ‘सामना’च्या अग्रलेखातून वेळोवेळी भाजपची झाडाझडती घेण्याचा नित्यनियम सुरु ठेवला असतानाच, भाजपवासी झालेले माजी खासदार निलेश राणे यांनीही राऊतांवर एकेरी भाषेत ‘ट्वीटहल्ला’ करण्याची सवय मोडलेली नाही. मात्र निलेश राणेंनी असे राऊतांवर खालच्या भाषेतील ट्विट केल्यामुळे माजी मुख्यमंत्री नारायण राणे यांनी संजय राऊतांची चक्क सोशल मिडियावर माफी मागितली. मात्र ज्या अकाऊंटवरुन हा मेसेज टाकण्यात आला आहे ते राणे यांचं अधिकृत ट्विटर अकाऊंट नाही. असं असलं तरी, या ट्विटची सोशल मीडियावर चांगलीच चर्चा सुरू आहे.
शिवसेनेचे खासदार संजय राऊत यांचा हार्मोनियम वाजवतानाचा एक व्हिडिओ एका वरिष्ठ पत्रकाराने सोशल मिडियावर टाकला होता. हा व्हिडिओ संजय राऊत यांनी ही २५ मार्च २०२० रोजी रिट्विट केला. हा व्हिडिओ सोशल मिडियावर मोठ्या प्रमाणात वायरल ही झाला. त्या व्हिडिओला टॅग करत, माजी खासदार निलेश राणे यांनी संजय राऊतांवर एकेरी उल्लेख करत एक ट्विट केले आहे. ‘ आईशपथ मला डाऊट होता संज्याला मी चर्चगेट स्टेशन प्लॅटफाॅर्मवर पेटी वाजवताना फाटक्या कपड्यात बघितलं होतं. आज खात्री झाली”असं ट्विट निलेश राणे यांनी केलं.
निलेश राणे यांच्या ट्विटला अनुसरूनच नारायण राणे यांच्या नावे असलेल्या ट्विटर हून ‘पोरगं वाया गेलं आहे, त्याच्यावतीने मी माफी मागतो…” असे ट्विट करत ते संजय राऊतांना टॅग केलं आहे. मात्र नारायण राणेंच्या ज्या ट्विटर अकाऊंटवरून ही माफी मागितली आहे. प्रथमदर्शनी हे ट्विटर अकाऊन्ट खासदार नारायण राणे यांचे नसल्याचे कळते. कुणी तरी खोडसाळ वृत्तीने हे कृत्य केल्याचे सांगितले जात आहे. मात्र या ट्विटची सध्या राजकिय वर्तुळात जोरदार चर्चा आहे.
हेही वाचाः- अन्न व औषध प्रशासन विभागकडून विशेष नियंत्रण कक्षाची स्थापना
भाजपा नेते नारायण राणे आणि शिवसेना यांच्यात किती वाद आहेत हे सर्वांनाच माहिती आहे. मात्र त्यांचेअनेक नेत्यांशी वैयक्तिक संबंध खूप चांगले आहेत. काही दिवसांपूर्वीच राज्यसभेत एकाच बाकावर नारायण राणे, अरविंद सावंत, सुनिल तटकरे, संजय राऊत आणि सुप्रिया सुळे ‘चाय पे चर्चा’ करताना दिसले.
हेही वाचाः- लोकांना देणार धान्याऐवजी थेट पीठ, महसूलमंत्र्यांची माहिती