मुंबई महानगर प्रदेश विकास प्राधिकरण (MMRDA) पुढील दोन आठवड्यांत मुंबईतील पाच महत्त्वाचे पायाभूत प्रकल्प सुरू करण्याच्या तयारीत आहे. जूनच्या पहिल्या पंधरवड्यात हे सर्व प्रकल्प एकाच दिवशी जनतेसाठी खुले करण्याचाही विचार सुरू असून अंतिम तारीख अद्याप निश्चित झालेली नाही.

यामध्ये सर्वात महत्त्वाचा प्रकल्प म्हणजे मुंबई मोनोरेलची पुन्हा सुरू होणारी सेवा. सप्टेंबर 2025 पासून तांत्रिक बिघाडांमुळे मोनोरेल सेवा बंद होती. मागील पावसाळ्यात आलेल्या तांत्रिक अडचणींनंतर दुरुस्तीचे काम करण्यात आले असून आता अंतिम सुरक्षा तपासणी पूर्णत्वाकडे आली आहे.

निवृत्त मेट्रो रेल्वे सुरक्षा आयुक्त पी. एस. बघेल यांच्याकडून तपासणी सुरू असून आवश्यक सुरक्षा प्रमाणपत्र मिळाल्यानंतर सेवा पुन्हा सुरू केली जाणार आहे.

याचबरोबर मेट्रो लाईन 2 बीचा विस्तार चेंबूर नाक्यापर्यंत केला जाणार आहे. सध्या डायमंड गार्डनपर्यंत असलेला मार्ग आता चेंबूर नाका स्टेशनपर्यंत वाढवण्यात येणार आहे. यामुळे चेंबूर नाक्यावर मेट्रो आणि मोनोरेल यांच्यात इंटरचेंज सुविधा उपलब्ध होणार असून प्रवाशांना मोठा फायदा होणार आहे. या विस्ताराची सुरक्षा तपासणीही पूर्ण झाली आहे.

सांताक्रूझ-चेंबूर लिंक रोड (SCLR) प्रकल्पाचा दुसरा टप्पाही पूर्णत्वाच्या मार्गावर आहे. तब्बल 13 वर्षांपासून सुरू असलेल्या या प्रकल्पांतर्गत 1.9 किलोमीटर लांबीचा उड्डाणपूल बांद्रा-कुर्ला कॉम्प्लेक्स (BKC) आणि वाकोला यांना मुंबई विद्यापीठाच्या कलीना कॅम्पस मार्गे जोडणार आहे. बीकेसीकडे जाणारा मार्ग वाकोला उड्डाणपुलाशी जोडला जाईल, तर सांताक्रूझकडे जाणारी लेन SCLR केबल-स्टेड ब्रिजच्या दुसऱ्या डेकशी जोडली जाणार आहे.

MMRDA कडून कलानगर येथे नव्या ‘आर्ट अँड इव्हेंट प्लाझा’चे उद्घाटनही करण्यात येणार आहे. वेस्टर्न एक्सप्रेस हायवे आणि सायन-धारावी रोडच्या जंक्शनजवळ, बीकेसी प्रवेशद्वाराशेजारी 10,500 चौरस मीटर जागेवर हा प्लाझा विकसित करण्यात आला आहे. येथे 100 आसनक्षमतेचे अँफीथिएटर, फूड ट्रकसाठी जागा, सावलीतील बसण्याची व्यवस्था, लॉन्स, वॉकिंग ट्रॅक आणि खुल्या जागांचा समावेश आहे.

मिरा-भाईंदरमधील गोल्डन नेस्ट उड्डाणपूलही लवकरच वाहतुकीसाठी खुला केला जाणार आहे. मेट्रो-९च्या डबल डेकर कॉरिडॉरचा भाग असलेला हा 1.1 किलोमीटर लांबीचा उड्डाणपूल सुरक्षेच्या दृष्टीने काही बदलांनंतर सुरू केला जाणार आहे. भायंदरकडे जाणारी डाव्या बाजूची लेन सध्या बंद ठेवण्यात आली असून अतिरिक्त दिशादर्शक फलक आणि सुरक्षा व्यवस्था बसवण्यात आली आहे.

MMRDA चे हे पाच प्रकल्प सुरू झाल्यानंतर मुंबई आणि उपनगरांतील वाहतूक व्यवस्थेला मोठा दिलासा मिळण्याची शक्यता व्यक्त केली जात आहे.

हेही वाचा

ठाणे मेट्रो-४ची प्रतीक्षा कायम