मुंबईतील सर्व विकासकांमासाठी केंद्रीय पर्यावरण खात्याच्या वतीने पर्यावरण परवानगी देण्यात येते. मात्र यापुढे २० हजार ते दीड लाख चौरस मीटर क्षेत्रफळातील बांधकामांना महापालिकेकडून ही परवानगी देण्यात येईल. त्यासाठी महापालिकेत पर्यावरण कक्ष स्थापन करण्यात आला आहे. मुंबईतूनच पर्यावरणाबाबतची परवानगी मिळणार असल्याने सरकारी प्राधिकरणाच्या माध्यमातून सुरू असणाऱ्या विविध पायाभूत प्रकल्पांसोबतच बिल्डरांनाही या निर्णयाचा मोठा दिलासा मिळणार आहे.
मुंबई महापालिका क्षेत्रात ‘इज ऑफ डुइंग बिझनेस’ अंतर्गत विविध व्यवसायिक परवानग्या मिळविण्याची प्रक्रिया सुलभ होण्यासाठी महापालिका प्रयत्नशील आहे. त्याअंतर्गत हा ‘पर्यावरण कक्ष’ सुरु करण्यात आला आहे. या कक्षाद्वारे २० हजार चौरस मीटर ते दीड लाख चौरस मीटर एवढे क्षेत्रफळ असणाऱ्या बांधकाम प्रकल्पांना मुंबईतच परवानगी मिळविणे शक्य होणार आहे, असे विकासक नियोजन खात्याचे प्रमुख अभियंता संजय दराडे यांनी सांगितले.
मोठ्या बांधकाम प्रकल्पांना पर्यावरण विषयक परवानगी देण्याबाबत पडताळणी करण्याचे व अनुषंगिक अहवाल देण्याचे अधिकार या कक्षाला बहाल करण्यात आले आहेत. या कक्षाद्वारे देण्यात आलेल्या अहवालाच्या आधारे संबंधित प्रकल्पाला पर्यावरण विषयक परवानगी देणे बंधनकारक असल्याचेही दराडे यांनी स्पष्ट केले.
हे देखील वाचा -
डाऊनलोड करा Mumbai live APP आणि रहा अपडेट
मुंबईशी संबंधित प्रत्येक बातमी आणि अपडेट मिळवण्यासाठी Mumbai live च्या फेसबुक पेजला लाईक करा
(खाली दिलेल्या कमेंट बॉक्समध्ये तुमच्या प्रतिक्रिया अवश्य द्या)