मुंबई मेट्रो वनने आज, 10 ऑगस्टपासून वर्सोवा-अंधेरी-घाटकोपर मेट्रो मार्गावर नवीन ‘मिक्स्ड-लूप’ ऑपरेशनल पॅटर्न सुरू केला आहे. संध्याकाळच्या गर्दीच्या वेळेत प्रवाशांची वाढती संख्या लक्षात घेऊन मेट्रोची वारंवारता आणि प्रवासी क्षमता वाढवण्यासाठी हा बदल करण्यात आला आहे.

अंधेरी-घाटकोपरदरम्यान दर 3 मिनिटांनी मेट्रो

नव्या व्यवस्थेनुसार एक मेट्रो घाटकोपर-अंधेरी शॉर्ट लूपवर, तर त्यानंतरची मेट्रो नेहमीच्या घाटकोपर-वर्सोवा पूर्ण मार्गावर धावणार आहे.

यामुळे अंधेरी आणि घाटकोपरदरम्यान मेट्रोची वारंवारता वाढणार आहे. या विभागातील पीक अवर हेडवे 3 मिनिटे 20 सेकंदांवरून 3 मिनिटांपर्यंत कमी होणार आहे.

प्रवासी क्षमता 20 टक्क्यांहून अधिक वाढणार

या बदलामुळे अंधेरी-घाटकोपर विभागाची प्रवासी वाहून नेण्याची क्षमता 20 टक्क्यांहून अधिक वाढणार असून, सुमारे 28 हजार अतिरिक्त प्रवासी क्षमता उपलब्ध होणार आहे.

मुंबई मेट्रो वनच्या म्हणण्यानुसार, घाटकोपर-अंधेरीदरम्यान प्रवास करणाऱ्या 85 टक्क्यांहून अधिक प्रवाशांना या बदलाचा फायदा होण्याची शक्यता आहे.

रोजच्या मेट्रो फेऱ्याही वाढणार

नव्या वेळापत्रकानुसार आठवड्याच्या दिवसांमध्ये मेट्रोच्या फेऱ्यांची संख्या 476 वरून 484 करण्यात येणार आहे.

दरम्यान, वर्सोवा-अझाद नगरदरम्यान पीक अवर हेडवे 362 सेकंद राहणार आहे.

संध्याकाळी शॉर्ट-लूप सेवा

घाटकोपर-अंधेरी शॉर्ट-लूप सेवा केवळ संध्याकाळच्या पीक अवरमध्ये चालवली जाणार आहे.

• पहिली शॉर्ट-लूप मेट्रो: संध्याकाळी 6:23 वाजता

• अंधेरी डाउन प्लॅटफॉर्मवरून सुटणार

• शेवटची शॉर्ट-लूप मेट्रो: रात्री 8:23 वाजता

प्रवाशांचा वेळ वाचणार

मुंबई मेट्रो वनचे CEO श्यामंतक चौधरी यांच्या म्हणण्यानुसार, उपलब्ध पायाभूत सुविधांचा अधिकाधिक वापर करून मेट्रोची क्षमता वाढवण्याच्या उद्देशाने हा मिक्स्ड-लूप पॅटर्न लागू करण्यात आला आहे.

या बदलामुळे प्रतीक्षा वेळ कमी होणे, मेट्रोची वारंवारता वाढणे आणि अंधेरी-घाटकोपरदरम्यान अतिरिक्त प्रवासी क्षमता उपलब्ध होणे अपेक्षित आहे. त्यामुळे संध्याकाळच्या गर्दीच्या वेळी प्रवाशांना अधिक जलद आणि विश्वासार्ह मेट्रो सेवा मिळण्याची शक्यता आहे.

हेही वाचा

तांत्रिक बिघाडामुळे मुंबई लोकल सेवा विस्कळीत