मुंबईच्या पूर्व मुक्त मार्गावर टाटा रिसर्चच्या विद्यार्थ्यांच्या बसचा भीषण अपघात झाल्याची घटना बुधवारी रात्री घडली. या अपघातात टाटाचे 15 ते 16 विद्यार्थी गंभीर जखमी झाले आहेत. या अपघाताची नोंद आरसीएफ पोलिस ठाण्यात करण्यात आली असून पोलिस अधिक तपास करत आहेत.
टाटा इन्स्टिट्युट ऑफ फंडामेंटल रिसर्चचे विद्यार्थी नेहमीप्रमाणे बुधवारी चेंबूर येथील त्यांच्या हॉस्टेलमध्ये परतत होते. त्यावेळी पूर्व मुक्त मार्गावर भरधाव वेगात बस चालवत असलेल्या चालकाचे नियंत्रण सुटले. त्यावेळी बस पांजरपोळ बोगद्याजवळील दुभाजकाला धडकली. हा अपघात इतका भीषण होता की, बसचा अक्षशा चेंदामेंदा झाला. या भीषण अपघातात बसमधील 15 ते 16 विद्यार्थी जखमी झाले असून चालकाची प्रकृती गंभीर असल्याचं सांगितलं जात आहे. या सर्वांना उपचाराकरता पालिकेच्या शताब्दी रुग्णालयात दाखल करण्यात आलं आहे. या प्रकरणी आरसीएफ पोलिस ठाण्यात तक्रार नोंदवण्यात आली आहे.