दमदार अभिनेता इरफान खान यांचं मुंबईत निधन झालं. ते ५४ वर्षांचे होते. इरफान खान दीर्घ काळापासून न्यूरोएन्डोक्राइन ट्यूमर नावाच्या आजाराशी झुंज देत होते.
मंगळवारी इरफानची प्रकृती अचानक खराब झाली. त्यानंतर त्यांना तातडीनं रुग्णालयात नेण्यात आलं होतं. इरफानला मुंबईतील कोकिलाबेन रुग्णालयात दाखल करण्यात आलं होतं. मंगळवारी इरफानला रुग्णालयाच्या इंटेन्सिव्ह केअर युनिटमध्ये (आयसीयू)मध्ये ठेवण्यात आलं होतं.
यापूर्वी इरफान खान परदेशात असल्याचं सांगण्यात येत होतं. पण आता तो मुंबईत असल्याचं स्पष्ट झालं आहे. अलीकडेच त्याच्या आईचे जयपूरमध्ये निधन झाले आणि त्याला लॉकडाऊनमुळे जयपूरमध्ये आईच्या अंत्यसंस्कारात सहभागी होता आले नाही. व्हिडिओ कॉन्फरसिंगद्वारे इरफाननं आपल्या आईचं अंत्यदर्शन घेतलं होतं.
इरफान खाननं १६ मार्च २०१८ मध्ये आपल्या आजाराविषयी खुलासा केला होता. 'आपण अपेक्षा करतो, ते देणे आयुष्यासाठी बंधनकारक नाही' या आशयाचा मार्गारेट मिशेल यांचा कोट इरफाननं पोस्ट केला होता. त्यानंतर 'न्यूरोएन्डोक्राईन ट्यूमर'चे निदान झाल्याची माहिती इरफाननं दिली होती.
— Irrfan (@irrfank) March 16, 2018
'अनपेक्षित गोष्टींमुळे आपली वाढ होते. गेल्या काही दिवसात तेच घडत गेलं. मला 'न्यूरोएन्डोक्राईन ट्यूमर' झाल्याचं समजलं. सध्या तरी कठीण झालं आहे. पण माझ्यासोबत असलेल्या व्यक्तींचं प्रेम आणि सामर्थ्यामुळे माझ्यात आशेचा किरण निर्माण झाला आहे. मला उपचारांसाठी परदेशात जावं लागणार आहे. मला शुभेच्छा पाठवत राहा, अशी विनंती करतो. न्यूरो म्हणजे प्रत्येक वेळी मेंदूशी संबंधित नाही, हेच उत्तर मी अफवांना देईन. गूगल करणे हा संशोधनाचा सोप्पा मार्ग आहे. ज्यांनी माझ्या शब्दाखातर वाट पाहिली, त्यांना आणखी किस्से सांगण्यासाठी मी परत येईन, हीच आशा' असं इरफाननं लिहिलं होतं.
त्यानंतर या आजारावर उपचार करण्यासाठी तो लंडनला गेला होता. दहा महिन्यांनी इरफान उपचार पूर्ण करुन मायदेशी परतला आणि आपल्या आजारातून सावरत 'अंग्रेजी मीडियम' या चित्रपटाचं चित्रीकरणही केलं होतं.
हेही वाचा