कुलाबा ते सिप्झ मेट्रो ३चे कारशेड आरे वसाहतीत उभारणार?

कुलाबा ते सिप्झ मेट्रो ३चे कारशेड आरे वसाहतीत उभारण्यात येणार असल्याचा संशय सामाजिक संस्थांकडून व्यक्त केला जात आहे. कारशेड नक्की कोठे उभारणार याची स्पष्टता सरकारने द्यावी, अशी मागणी घेऊन पर्यावरणवादी सामाजिक संस्थांनी आरे वसाहतीत पुन्हा आंदोलनाला सुरुवात केली आहे. पर्यावरण कार्यकर्त्यांनी त्यांच्या मागण्या घेऊन आरे वाचवा मोहिमेअंतर्गत रविवारी आरे वसाहतीत आंदोलन केलं.

सरकारने सविस्तर प्रकल्प अहवाल तयार केल्याशिवाय आणि सामाजिक संस्थांशी चर्चेविना आरेमध्ये कोणतेही काम करू नये, अशी मागणी सामाजिक संस्थांनी केली आहे. त्यामुळं राज्य सरकारनं कांजुरमार्ग, बीकेसी अथवा कलिना येथील जागांचा कारशेडसाठी विचार करावा. तसंच त्यांचा डीपीआर द्यावा. आरे वसाहतीतील दुसऱ्या टप्प्याला लवकर जंगल घोषित करावे, मिठी नदीजवळ केलेले सिमेंट काँक्रिटीकरण काढून टाकावे, आरेतील बेकायदेशीर अतिक्रमणे हटवावीत, अशी मागणी आंदोलनादरम्यान करण्यात आल्याची माहिती मिळते.

आरे इथं प्रस्तावित कारशेडला पर्यावरणवादी कार्यकर्त्यांनी विरोध दर्शविला होता. महाविकास आघाडीचे सरकार सत्तेत येताच त्यांनी आरे येथील प्रस्तावित कारशेड कांजुरमार्ग इथं नेण्याचा निर्णय घेतला. मात्र, कांजुरची जागा वादात सापडली आहे. त्यामुळं कारशेड नक्की कुठे होणार हा प्रश्न अद्यापही अनुत्तरीत आहे. त्यातच मुंबई मेट्रो रेल्वे कॉर्पोरेशनकडून (एमएमआरसीएल) मेट्रोच्या चाचणीसाठी आरेजवळ मरोळ इथं तात्पुरत्या कारशेडची उभारणी सुरू आहे.

या कारशेडकडे येणारा मार्ग भविष्यात आरे इथं यापूर्वी प्रस्तावित असलेल्या कारशेडकडे जाणार असल्याची शंका सामाजिक कार्यकर्ते उपस्थित करत आहेत. कांजुर येथील प्रस्तावित कारशेडच्या ठिकाणी मेट्रो मार्ग घेऊन जाण्यासाठी तयार केलेला सविस्तर प्रकल्प अहवाल (डीपीआर) अथवा मार्गाचे डिझाइन देण्याची मागणी माहिती अधिकारात करूनही याबाबत प्रशासनाकडून कोणतीही माहिती दिली जात नाही. त्यातून सरकार आरेमध्ये कारशेड करणार का अशी शंका निर्माण होत असल्याची माहिती मिळते.